Smith Rowe-a'n goal a khung

Inkhelh tam duh vanga Arsenal chhuahsantu Emile Smith Rowe chuan Fulham tana a goal hmasa ber a khung a, an goal pakhat zawk pawh Gunners player hlui tho Alex Iwobi khung niin Leicester City chu 2-1 in an hneh.

Cottagers hian a tir aṭangin inkhel an thunun nghal, minute 18-naah an club player man tam ber Smith Rowe hian Adama Traore pek chu a tlawh lut - Foxes tan defender Wout Faes chuan sut ve mah se, hun tawp dawn lamah Iwobi chuan Fulham chakna goal a khung.

English midfielder, pound maktaduai 34 man Smith Rowe chuan, "Craven Cottage bikah ka match hmasa ber a ni a, goal ka khung nghal bakah point thum kan hlawh chhuak bawk, hetiang baka thil lawmawm dang hi a awm chuang lo," a ti.

Hale End aṭanga inzir chhuak Smith Rowe hian theihna sang tak a nei, mahse hliamin a tibuai fo a, a inkhel tam tawk thei ṭhin lo. Arsenal manager Mikel Arteta hnuaiah khelhna a chang mumal lo a, tunah chuan chona thar a hmachhawn a ni.