Ka naute inkhel a hmuhnawm - Luis Enrique

Paris Saint-Germain coach Luis Enrique chu a nauten Ligue 1 an khelh danah a lawm hle a, kar tawp inkhela Montpellier 6-0 ngawta an sawp chu hmuhnawm a tih thu a sawi.

Paris khawpuia inkhelah PSG tan hian Bradley Barcola chuan goal hnih a khung, ani bakah hian Marco Asensio, Achraf Hakimi, Warren Zaire-Emery leh Lee Kang-in ten goal khat ṭheuh an khung bawk.

Kum 54 mi Enrique chuan, "Khelmual chhunga ka naute chet vel dan kha sawisel tur ka hre lo, min ti hlim veng veng tawp mai a ni, goal venhim dan leh kan nawr dan te kha kawng engkim a dik em em vek a ni.

"Football hi kan tan chuan a hmuhnawm a, player ṭha leh in man tak tak te inkhel en kha mipui lam tan pawh a hlawh thlak ngei ka beisei," a ti a, a naute khelh danah a lungawi hle tih a chiang.

PSG hian an player ṭha Kylian Mbappe an chan a, France captain chhuah hnuah Ligue 1 bul an ṭan fuh rih hle, match hnih an khelh tawh chinah an chak ve ve, goal 10 khungin anmahni lamah goal khat chauh a la lut.