Marseille tan Mandanda a khel zel dawn

French club ṭha Marseille legend Steve Mandanda chuan Ligue 1 club tana khelh chhunzawm zel turin contract thar a ziak a, season thum dang a khelh chhunzawm ang. 

Kum 35 mi goalkeeper hian kum 2024 thleng chu French club tan hian a khel dawn tihna a ni a, Marseille-ah hian a career a hmang zo ngei dawn niin a lang. Ligue 2 club Le Havre aṭanga a career ṭantu hian kum 2007 khan loan-in Marseille hi a zawm a, kum 2008-ah a nghetin a lut zui. Kum 2016 khan Crystal Palace tana khel turin a chhuak a, season khat hnuah Marseille-ah bawk hian a kir leh a ni. 

Mandanda hian Marseille tan Ligue 1 nomawi chu 2009-10 season khan a lo chawi tawh a, French League Cup (3) leh French Super Cup (2) nomawi chawi tawh bawkin kum 2018 khan Europa League final lut mah se Atletico Madrid an ngam lo.