East Bengal tana khel tur Jeje

Mizo tlangval Jeje Lal-pekhlua chuan East Bengal tana khel turin contract a ziak fel ta a, 'Mizo Sniper' tia hming lem an pek striker hian Kolkata club-ah kum khat chhung khel turin contract a ziak. 

Jeje hian season hmasa kha hliam vangin a khel lo a, tun season-ah erawh dam lam pan chhoin Red and gold jersey a ha dawn ta. Hnahthial tlangval chuan, "East Bengal hi club lian tak an nih avangin khelh a châkawm a, chuvang chuan ka zawm a ni. 

"Coach thar ṭha tak an nei a, Robbie Fowler hnuaia khelh pawh a châkawm alawm," tiin Kolkata club a pan chhan Vanglaini a hrilh a; Liverpool legend enkawlna hnuaia Mizo tlangval inkhel tur hi hmuh a châkawm hle. 

Jeje hian Chennaiyin tan season ruk a khelh chhungin match 69-ah goal 23 a khung a, assist vawi sarih a nei thei - Super Machans (Chennaiyin sawina) tan chuan 'legend' a ni a, ISL-ah a vawi khat nan club dang tan a khel ve dawn ta. 

India international striker chuan Vanglaini hnenah a hmachhawp hrilhin, "Season khat tawp inkhel loa awm ka nih avangin ka tan chuan a harsa dawn a, taksa a fit thei ang bera awm hi ka tan chuan tum hmasak ber tur a ni," a ti. 

Jeje hian Pune FC aca-demy aṭanga a career ṭanin kum 2009 khan I League second division a khel.Pune-ah hian a hming a chher a, kum 2013 thleng a khelhsak - 2010-11 khan Pailan Arrows-ah loan a kaltir a ni bawk. 

Pailan Arrows-ah a awm lai hian Indian media-ten an ngaihven ṭan a, I League-ah match 15 khelin goal 13 ngawt a khung! Pune lamah kir lehin season hnih a khel a, a hnuah Dempo SC, Mohun Bagan leh Chennaiyin tan a khel leh a ni. 

India tan vawi 56 inlana goal 23 khung thei striker hian Mohun Bagan tan I League leh Federation Cup nomawi a chawi tawh a, Chennaiyin tan Indian Super League-ah vawi hnih a champion tawh bawk. 

SAFF Cup-ah India tan vawi thum a champion a, Indian football a mimal chawimawina dawn theih ang chu a dawng kim - AIFF Player of the Year (2016) leh FPAI Indian Player of the Year (2015-16) chu a chawimawina dawng zinga ngaihhlut hlawh zual a ni. 

Jeje hian East Bengal-ah a number chuam '12' a ha dawn a, Red and Golds tan chuan jersey number 12 hi rohlu bik a ni. Jeje hma hian club legend-ten number 12 hi an lo ha tawh. 

1949-53 chhoa East Bengal forward 'The VADAS' tia hriat hlawh zinga mi Appa Rao, Indian football legend Subhash Bhowmick, 'Badshah' (Lal/King) tia hminglem an pek Iran international Majid Bishkar leh Indian football a hming dai tawh lo tur Bhaichung Bhutia-te chuan East Bengal jersey number 12 hi an lo ha tawh a ni.