Man United leh Leeds United inkhelh hun a her chhuak

English club inhal ber zinga mi Manchester United leh Leeds United te chu Pathianni zan dar 10:00 hian Old Trafford an inhmachhawn dawn. Premier League-a an intawn hnuhnun ber hi kum 2004 daih tawh kha a ni a, Old Trafford-ah 1-1 in an inhnehtawk. 

Leeds United an relegate avangin club pahnih hi inelna sang berah kum 16 tehmeuh an inhmachhawn tawh lo a, chutihrualin FA Cup leh League Cup-ah erawh  ṭum khat ve ve intawng fuhin vawi khat ve ve hnehna an chang.

An chanchin hi tun hnai mai a ni lo a, kum 100 liam ta daih tawh aṭang khan a inṭan. Club pahnih an inhal chhoh tak tak erawh Indopui pahnihna hunlai vel kha a ni a, United manager ropui Sir Matt Busby leh Leeds manager ropui Don Revie te hun a inrual avangin inkhel boruak a sang hle.

United-in Bobby Charlton, Denis Law leh George Best te an kawl a, Leeds-in Jack Charlton, Billy Bremner leh Norman Hunter te an kawl thung. Heng ho hi chu tun hma boruak daih a ni a, mi nawlpui hriat phak ni lo. 

Mizorama mi nawlpuiiin TV an neih hnuah club pahnih inhalna hi tih nun tharin a awm. Premier League ṭan hma season-ah Leeds United an champion a, Sir Alex Ferguson-a'n an player pawimawh Eric Cantona a chhuhsak. Hei hi football history-a transfer fuh ber zinga sawi a ni a, hemi hnu hian Leeds aṭangin Sir Alex hian Rio Ferdinand leh Alan Smith te a seng lut bawk.

Man United-in Leeds ropuina tur an dal a, Peakocks hian Ferdinand, Smith, Jonathan Woodgate, Lee Bowyer, Mark Viduka, Harry Kewell, Jimmy Floyd Hasselbaink leh Danny Mills te an kawl ṭhin chungin nomawi lian tham an chawi lo.

Leeds hian tun hma angin player duhawm tak tak kawl tawh lo mah se coach ropui Marcelo Bielsa an kawl. Argentine manager hi mi bik a nihzia chu Championship-ah Leeds United a champion pui a, FIFA-in coach ṭha a thlan zingah pathumna a ni pha. Bielsa tluk loh hi Jurgen Klopp leh Hans-Dieter Flick te an ni a, midang zawng chu a hnuaia awm vek an ni.

Bielsa hian player langsar a kawl lo chungin Premier League-ah attacking football a khel ngam a, an match hnuhnung berah Newcastle United 5-2 in an sawp. Kalvin Phillips, Ezgjan Alioski, Mateusz Klich leh Patrick Bamford te hi player langsar an ni lo a, mahse Bielsa chuan heng player hmang hian inkhel hmuhnawm a lantir thei a ni.

Man United manager Ole Gunnar Solskjaer erawh manager naran tih theih a ni a, Old Trafford-a hming a chher tawh avangin tuna a hna hi chelh ve thei chauh a ni. Amaherawhchu Norwegian manager hian khawvel player ṭha ni pha Paul Pogba, Bruno Fernandes, Marcus Rashford leh David de Gea te a kawl miau a, chak tura rinkai zawk an ni ang.