Spain leh Germany inkhel a hmuhnawm

UEFA Nations League bul ṭannaah Europe ram lian pahnih an inhmachhawn a, inelna hi friendly match u awra ngaih theih ni mah se inkhel erawh entu awm lo chungin a hmuhnawm hle.

Mercedes-Benz Arena, Stuttgart-ah Germany-in Chelsea player thar Timo Werner hmangin goal khung hmasa mah se Spain-in left back Jose Luis Gaya hmangin injury time minute ruknaah an sut.

League group 4 inkhel dangah Ukraine chuan 2-1 in Switzerland an hneh ve bawk. Pathianni zan dar 12:15-ah Germany-in Switzerland an hmachhawn ang a, Spain-in Ukraine an mikhual ve bawk ang.

Premier League season ṭan nan kar khat chauh a awm tawh a, English club nena sawi zawm theih player-ten mit an la. Chelsea forward thar Werner-a'n bul a ṭan laiin an la lak tur Kai Havertz-a'n bench a luah lum tluan.

Arsenal keeper Bernd Leno aiah Kevin Trapp thlan a ni a, Germany team-ah Toni Kroos te awm bawk mah se an ṭhat dan ber erawh an hlat hle. 

Spain tan Manchester City lak thar Ferran Torres leh Leeds United forward thar Rodrigo ten bul an ṭan a, Liverpool nena sawi zawm Thiago Alcantara-a'n midfield a luah lum.

Manchester United-in keeper Dean Henderson an kawl tur thu an ti chiang a, Spain keeper David de Gea dinhmun a chiang ta lo. Amaherawhchu Spanish keeper De Gea hian Spain kawr ha chungin a la ṭha tawk tih a pholang.

Spanish keeper hian Thilo Kehrer, Julian Draxler leh Leroy Sane te goal khung tur a dang a, England keeper Henderson-a'n manager Ole Gunnar Solskjaer-a duhsakna a dawng a nih loh chuan first keeper a la ni lawk dawn lo.

Spain coach Luis Enrique-a'n tawnhriat nei tlem player chhawr tam mah se theihna sang tak an neih avangin khualmualah pawh an hmuhnawm hle.

Spain forward Rodrigo-a pawhin chance ṭha a nei nghal a, amaherawhchu Germany keeper Kevin Trapp-a'n a tihsual thup nan a dang leh hman hlauh. Leeds lak thar Rodrigo hian second half-ah pawh mawi zetin a pet a, goal pawnah chiah a kal.

Chelsea-in Werner chungah beisei an nei sang a, German forward hian minute 51-naah a petna tur khawp hmunruak insiamin goal ṭha zet a khung. Blues ṭantute tan nuih ver verna tham a tling. Man City aṭanga Bayern Munich zawmtu Leroy Sane pawh hmuhnawm viau mah se goal hmaah a vannei tawk lo.

Champions League-a Bayern Munich champion puitu Thiago Alacantara-a'n talent nei ṭha bik a ni tih a pholang a, Spain midfield timawitu ber a ni a, Liverpool-in tan sum phawrh a awl sawt ang.

Germany-in chance ṭha an hlah an tuar a, hun tawpah Spain-in an nawr na hle. Substitute Ansu Fati-a'n injury time minute hninaah tauh lut mah se pawm a ni lo, Germany an ṭang zo chuang lo. Injury time minute nganaah Rodrigo tauh chu Gaya-a'n goal-ah chantirin, Spain leh Germany 1-1 in an inhnehtawk.

Spain coach Luis Enrique chuan, "De Gea khelh dan ka hmuh khan keeper kan neih ṭhatzia ka hria. Tuna mi ang hian England-ah pawh khel fo, amaherawhchu ani leh Kepa hi chu an tihsualin an chanchin an ziak nasa ṭhin. Media lamin ka keeper-te hi an dim lo a, kei chuan duat takin ka enkawl," tiin a keeper pahnih a chhan a, an khelh danah a lungawi thu a sawi.

Germany coach Joachim Low chuan, "Ka naute khelh danah ka lungawi a, a tawp thlengin an theihna zawng zawng an chhuah. Team pahnih kan khel ṭha a, ka thlirnaah chuan chakna chance kan ngah zawkin ka hria," tiin chak phu zawk an nih thu a sawi.

Spain-in Germany an hmachhawn ṭumin Ansu Fati-a inlan a, Barcelona rawlthar duhawm hi kum 17 leh ni 308 mi chauh niin kum 84 chhunga La Roja tana khel thei naupang ber a ni.

Ansu Fati hian season liam ta khan La Liga match 24-ah inlanin goal sarih a khung a, inelna hrang hrangah match 33 khelin goal riat a khung. Guinea-Bissau-ah Fati hi piang mah se a naupan laiin Seville-ah a insawn a, kum riat a nihin Sevilla academy zawmin kum 10 a nihin La Masia a zawm.

Fati hian nikum August 25 khan Barcelona tan a khel ṭan a, kum 16 leh ni 298 lek mi a ni. Spain tana naupang ber record chelhtu hi Angel Zubieta a ni a, April 1936 khan Czechoslovakia nen an inkhelh ṭumin kum 17 leh ni 284 mi lek niin a inlan. 

Barcelona star Fati hian record khum theihna hun ṭha tak nei mah se Covid-19 vangin hun rei tak international match khelh a ni lo a, Zubieta record a him phah.