Harry Maguire Buaina Thil thlen dan leh Maguire kawmna

Manchester United captain Harry Maguire chuan Greek thuneitute aṭangin thla 21 chhung jail tang tura hremna a hmu a, chutihrualin a hremna hi kaltlangpui nghal loin kum thum chhung enthlak a 

ni dawn. 

August 20, Ninngania Mykonos leh Syros-a thil thleng vangin England defender Maguire bakah a unaupa Joe leh an ṭhianpa Chris Sharman te chu zan hnih chhung lock up-ah dah an ni a. English mite hi mipui tana hnathawktute vawi khat aia tam kut thlaka puh a ni a, thuneitute tham tum leh ṭawngkam duk dak lo hmanga puh an ni a, an puhnaah te hian thiam loh an chang.

Manchester United manager Ole Gunnar Solskjaer-a'n Premier League khelh zawh leh Europa League khelh ṭan hma siin player ṭhenkhat chawlh a pe. Hemi ṭum hian Maguire hian Greek thliarkar Santorini a tlawh a, buaina a tawk lo.

Europa League semifinal-ah Sevilla an hneh lo a, Ole Gunnar Solskjaer-a'n a player-te chawlh a pe. Maguire leh a chhungten Greek thliarkar dang Mykonos an tlawh a, helai hmun hi footballer tam takin chawlhna hmun atan an hmang.

United player dang Marcus Rashford, Brandon Williams leh Daniel James te pawh Mykonos-ah hian an kal. Maguire hi a nupui hual Fern, a unaupa leh Joe leh farnu Daisy bakah a pa Alan te nen an kal.

Transfermarkt-in a tarlan danin professional footballer zingah Maguire hian season liam ta khan minute a ngah ber a ni a, hemi a nih avang hian season thar ṭan hmaa chhungkuaa chawlh hman hi an thlahlel a ni.

August 20, Zirtawpni zingah chuan Greece rama thil thleng hi a darh a, zan lamah police-in Manchester United captain Maguire bakah Joe leh Sharman te an man thu an puang.

British Foreign Office chuan Zirtawpniah Maguire te chanchin hi a khelhna Man United leh player agency te an hrilh a, Inrinniah Syros-ah an chungthu an rel tur thu an hrilh tel tawh bawk. Man United chief legal counsel Patrick Stewart chuan Athens-a hmun nei Greek lawyer chu Maguire case buaipui turin an hrilh. England defender tana ding tur hian British lawyer duh mah se Athens-a license nei kher a ngaih avangin an duh tak lawyer an dintir thei lo.

Lock up-a an awm chhung hian ei tur an dawng ṭha lo a, an chhungte leh ṭhian hnai anmahni phone aṭangin an be thei lo. Chutihrualin England lam pawhin Maguire te chanchin an hria a, hma la turin Inrinniah agent Kenneth Shepherd, a nu Zoe bakah management agency aiawhte Greece-ah an thlawk lut.

Inrinniah Maguire aiawhte Greek thliarkarah an thleng hmana hriat a ni a, hetih lai hian Maguire erawh thuneituten Syros-ah thu an zawtfiah thung. Darkar khat chhung an inzawhfiah hnuin Maguire hian an puhnate a pha a, midang pahnihte pawhin an puhna hi an pawm lo bawk.

England defender hi Greece chhuahsan phalna pek a ni a, Pathianniah a farnu Daisy nen England an pan. A pa Alan leh a unaupa Joe te chu Thawhlehnia court hmaa inlan turin a cham bang thung.

Maguire ten anmahni puhna chargesheet chu Thawhṭanni tlai dar 5:00-ah an dawng a, Thawhlehni zing dar 8:00-ah thil dan kimchang phek 50 tehmeuha chhah hmuh tur a awm chauh. 

English defender chung thu hi dar 10:00 a rel ṭan tur a nih avangin Maguire aiawhte tan inpuahchahna tur hun ṭha a awm lo. Maguire lawyer te hian thurel hun sawn dil mah se judge-in a phalsak lo. 

Greek police aiawha dingte hian CCTV aṭanga lak video emaw thil thlen dan finfiahna tur phochhuah tur an nei lo.

Maguire te chhungkua hi a huhoin an chhuak a, an ṭawng dan leh hmel hmang aṭanga Albanian ni ngeia ngaihten Maguire-a farnu Daisy chu damdawiin an chiu. Hei hi buaina inṭanna ani a, Maguire-a ṭhiannu Ashden Morley chu court hmaah thu hretuah a ṭang.

Morley sawi dan chuan Maguire leh a nupui hual Fern te hian Daisy meng pual lai an hmu a, damdawi hmanga chiu a nih an ring nghal. Maguire hian chawlh an hman chhung atan hian driver leh minbus an hawh a, English defender hian driver chu an thlenna hotel-a letpui turin a hrilh.

Maguire hian Albanian mi te nena insual buaia an puhna chu a pha a, chutirhualin a unaunu khawihtute nen an buaina an nei tih erawh a pawm thung. Greek police (police thawmhnaw inbel lo) chuan driver chu police station-a kal turin a hriattir.

Joe leh Sharman te sawi danin police station awm dan chu a mak ang reng avangin rukbo an tumah an ngai. Police station-ah hian police pariatin (police thawmhnaw inbel lo) Maguire hi a ke ah an pet a, a career a tawp tih an hrilh bawk avangin an hlauthawnna a belhchhah.

Maguire chhung hnai te sawi danin England defender aiawha dingte hian police station-ah hian thil thlen dan video (CCTV) a awm ngei a ring a, heta ṭang hian thil thlen dan a chian theih an beiesei. Hei bakah hian Maguire ke nat dan hi forensic expert-ten zir chiang se tuna case kal laiah hian an puih theih an ring bawk.

Police officer erawhin Maguire hi kut kawl bun tir a tum laiin a nam a, a keah hliam tawrh phahin ni khat a office thei lo. Police officer dang chuan, "Tu nge ka nih in hria em? Manchester United captain ka nih hi. Sum ka ngah a, khawngaihin min chhuah ula, pawisa ka pe ang che u," tiin pawisa hmanga tham tumah a puh.

Police officer pakhat chuan boruak so sang beng dai tumin hma la mah se an zinga pakhat chuan ṭawngkam bawlhhlawh a hman thu a sawi. Court-in Police ṭanna a pawm a, Maguire te thiam loh a chantir. Maguire te hian court thutlukna hi an khinglet ang.

Trial chungchang?

Maguire :    A fel hlel hle. Court hmaa inlan tlaiah lehkha kan dawng chauh a, Greek ṭawng chauha an inziah avangin ka ukil nen inbiakna hun kan nei lo. Hun a chep em avangin kan chungchang ngaihtuah a nih kan ring lo a, mahse thurel hun sawn tura ka ngenna an pawm lo.

Court hmaah police i khawih thu an sawi a, a dik em?

Maguire :    An thuchhuah aṭang chuan police hnung leh kut ka khawihsak angin an sawi. Ka kut an phuar a, boruakah ka dah. Police an ni loa ka hriat avangin tlan chhiat ka tum a, ka ti na lo chuan ka hria. Eng pawh chu ni se min khawih nat ang em em chuan ka khawih let lo.

Police tham tumah an chhuah che a, a dik em?

Maguire :    A dik lo tih ka chiang. Ka nihna kha an hre ngeiah ka ngai. A chhan chu min khawih hma minute nga velah khan ka career a tawp tur thu min hrilh. Intham tumna a awm lo. Lung in luhnaa kan ṭhut lai khan kan mangang a, kan ṭap a, kan awmna chu hriatthiam har kan ti hle a ni.

An chet danah sawi tur nei em?

Maguire :    Thil tam tak ka ngaihtuah a, a chhan awm reng ka hre chhuak thei lo. Itsikna vang emaw inhriatthiam lo tawn vang emaw a ni thei a, a chhan hi ka hre lo tak tak a ni.

I khing let a, i hming hliauna thai reh theih i inring em?

Maguire :    Greek law ka ringtawk. An dan vangin tunah chuan hun rei zawk kan nei thei dawn. Kan 

ṭan chhan insawhnghet theihna hun ṭha kan nei a, court hmaah thu hrettu kan hruai thei dawn. Thudik hi a lanchhuah ngei ka ring.

Zu i rui em? Tuna thil thlen chhan hi a ni thei em?

Maguire :    Zu ka in lo tiha phat kual ka tum lo. Tlem a zawng chu ka lem. Ka bula awm ṭhin chuan zu ka in zawha ka mizia chu an hria ang. Zu in zawhah pawh ka ngaituahna a fim a, ka in thunun thei a, zu rui ka ni lo. Ka vanduai ve a ni.

Tuna thil thlen avang hian eng ang chiahin nge 

i hming a hliau, i inchhir em?

Maguire :    Mahni chanchin ṭha lo lam hmuh chu a hrehawm hle. Min awih emaw awih lo emaw court thuchhuak kha thudik nen chuan la inhlat hle. Ka miza leh nungchang erawh a la ngai reng. Ka rilru a pau khauh a, tuna ka harsatna tawh hi ka paltlang ngei ang.