Real-in ka kawng an dal ṭhin - Bale

Spanish champion Real Madrid forward Gareth Bale chuan Santiago Bernabeu chhuahsan duh mah se a kutah engmah a innghah loh thu sawiin, "Real kutah engkim a awm a ni," tiin a sawi. 

Bale chuan, "Season hmasa khan chhuah ka tum a, mahse hun dang a awm tawh lo tih tak takah khan ka kawng an dang a ni," tiin Real-a chhuahsan theihloh chhan chu club thuneitute vang a nih thu a sawi.

Welsh forward chuan sawi zawmin, "Nikuma chhuah ka tumna khan minti hlim a, ka hmaa inchhawp thil kha phur takin ka thlir a ni. Mahse, club khan a tawpah chhuah an phal lo. Inkhelh ka la duh reng a, football khelh châkna keimahah hian a la awm reng. 

"Kum 31 mi ka ni tawh a, mahse ka taksa a la hrisel ṭhain theihna tam tak ka la neiah ka ngai a ni," a ti a, Premier League lama kir a châk leh châk loh an zawhna chu, "Ka kutah engmah a awm lo a, Premier League club-in min duh a nih phawt chuan phur takin ngaihtuahna ka seng ang," a ti. 

Bale hian kum 2013 khan a hunlaia footballer manto ber ni turin Real hi pound maktaduai 85-in a zawm a, amah duhtu English club zingah Real lama kal tirtu a club hlui Tottenham Hotspur leh Manchester United an tel. 

Real Madrid tan match 251 inlana goal 105 khunga assist vawi 68 neitu Bale chuan, "Eng nge thleng dawn chu kan la hre thuai ang. Transfer bazar a inhawng rei dawn a, hun tam tak a la awm a ni. Hunin engkim a hrilhfiah mai ang, a nihna takah erawh Real Madrid kutah engkim a awm," a ti.

Spanish club tana Champions League nomawi vawi li chawi tawh Bale hi Real boss Zinedine Zidane-a hnuaiah a tla tlum lo hle. Season hmasa khan French manager hian, "A chhuah hi kan vai atan a ṭha zawk ang," tiin a sawi a, mahse Chinese Super League lama kar khata pound maktaduai khat bawr vel hlawh tura a kalna tur chu Real hian an dal leh si a ni. 

July thla tawp lam khan Bale-a agent Jonathan Barnett chuan a player hi, "Khawiahmah a kal lo ang," tiin a lo sawi tawh a, hei erawh Real Madrid a tih elna niin a lang. 

Covid-19 vanga La Liga chawlh lailawk khelh chhunzawm leh a nih hnu khan Bale hian league match khatah chiah bul a ṭan a, khelmuala a hun hman zat belhkhawm chu minute 100 chiah a ni. 

Season tluanin inelna hrang hrangah match 20 chiah a khel a, goal thum khungin assist vawi hnih a nei. Real-ah hian kar khatah £600,000 a hlawh mek a, Spanish champion team-ah ani aia hlawh hnem an awm lo - kum 2022 thleng contract a nei.