Hero I League qualifier Mohammedan-in tlawm nei loin season khar

Season thara I League khel tur zawnna Hero I League qualifier chu nimin khan khelh zawh a ni a, I League khel tura tling chiang tawh Mohammedan SC chuan an match hnuhnung berah Bengaluru United chu 0-0 in an inhnehtawkpui. 

I League qualifier final round-ah Mohammedan hian Zirtawpni khan an elpui ber Bhawanipore chu 2-0 a hnehin I League khel turin an lo tling chiang tawh a, match li an khelhah tlawm an nei miah lo. 

Fixture tih kim nana nimin lama inkhelah Mohammedan-in goal an khung loh avangin point khatah an lungawi a ṭul a, match li an khelh aṭanga point 10 neiin I League an inpetkai. 

Nimin inkhel dangah Bhawanipore FC chuan 2-0 in Ara FC an hneh a, Mohun Bagan boss hlui Sankarlal Chakraborty enkawlna hnuaia khel team hian Mohammedan an ngam loh avangin I League an beiseina erawh a tawp leh ta rih. 

Sum tam tak nen, player ṭha thei ang ber nen Mohammedan-in I League qualifier-ah bul an ṭan a, an match hnihnaa Ara FC 4-1 ngawta an sawp hnu lawkah coach naupang Yan Law chu an ban. 

Mohammedan chuan Yan Law hi team thuruk pawn lam mi hnena hrilh ṭhinah an puh a, club thuneitute nen an thu a inhmu lo - Mohammedan lam hian FIR an theh lut hial. 

Hetiang boruak karah hian Kolkata derby-ah Bhawanipore chu 2-0 in an hneh a, an match tawp berah goal khung lo mah se I League khel tura an tlin tho avangin Yan Law an ban kha an inchhir lo ang. 

Mohammedan-ah hian Mizo tlangval Vanlalbiaa Chhangte chu a awm a, Hriangtlang tlangval hian nimin inkhelah pawh bul a ṭan - minute 70-naah lakchhuah a ni. 

Kolkata 'Big Three' an tih huang chhungah East Bengal, Mohun Bagan leh Mohammedan SC dah an ni ṭhin a, hei hian Indian football a Mohammedan-in huhang an ngahzia chu a hrilhfiah. 

All India Football Federation (AIFF) pawh an rilru tak chuan I League a Mohammedan kir leh ta hi an lawm ang tih a chiang - East Bengal leh Mohun Bagan-in ISL an khelh tawh dawn avangin I League hlutna a tlahniam sawt dawn. 

Mahse, Mohammedan an awm leh tak avangin I League boruak dai lutuk tur chu a nung thar ang tih a chiang a, Kolkata club hian sum an ngah bawk avangin transfer bazar-ah an che na ang. 

Kum 2015 hnua a vawi khat nana I League khel tur club hian second division-ah pawh striker hlawh hnem Willis Plaza-te lalut turin pawisa an nei a, I League-ah an inren ring suh. 

Kolkata club Bhawanipore-in nimin inkhelah 2-0 in Ara FC an hneh a, East Bengal forward hlui Jiten Murmu leh West Bengal midfielder Supriya Pandit-ten goal khat ve ve an khung.

I League second division hi January 2020 khan khelh ṭan a ni tawh. Team 17-in inelna an hmachhawn a, group A, B leh C-ah ṭhen hran niin group B-ah team panga an awm a, A leh C-ah team paruk ve ve an awm thung. 

League round group B leh C-a a sang pahnih leh group A lama a sang berte chu final round khel turin an tling - group tinah hian I League/ISL club reserve team pathum ṭheuh an tel. 

Group A aṭanga team pakhat chiah an tlin chhan hi table a pahnihna hi ATK reserve an nih vang a ni a, reserve team tan division sawn theih a ni ve lo. Group B leh C lama a sang pahnih erawh club pangngai ve ve an ni thung. 

Covid-19 vangin qualifier hi chawlh lawk neih a nih bakah tihtawi a ni a, final round-ah ruahman sa angin team panga tling chu an inkhel kual.

Team panga an inkhelh kual vek hnua a sang ber chu I League khel turin an tling a, tlawm nei loin Mohammedan SC chuan tlangnel taka an lo khelh tawh ṭhinna I League bawk an zawm leh ta. 

Tun season I League-ah club 11 an inel dawn a, Mohammedan hma hian Sudeva FC chu I League khel tur hian sum hmangin an lo inlei tling tawh.

December a khelh tura ruahman I League-ah hian Aizawl FC, Chennai City, Churchill Brothers, Gokulam Kerala, Indian Arrows, Mohammedan SC, Neroca FC, Punjab FC, Real Kashmir, Sudeva leh Trau FC-te an inel ang.