US Open: Carlos Alcaraz inlan hun a thleng

Tennis inelna lian US Open chu nizan aṭang khan khelh ṭan a ni a, naktuk zing lamah Carlos Alcaraz a inlan ang - Spanish star hian Australian mi Li Tu-a a hmachhawn dawn, harsa vak loa chak thei tura ngaih a ni.

New York khawpuia tennis stadium hmingthang ber, khawvel huap pawha tennis khelhna hmun lian Arthur Ashe Stadium-ah Alcaraz a lut leh dawn a ni a, tun hma lama a lo champion tawhna hmun a ni a, a khingpui tur Tu-a erawh Grand Slam match a khelh vawi hnihna tur chauh a ni thung.

Rinkai Alcaraz

Player ropuite hun a liam chho ve mek a, tun hnaiah Alcaraz a rawn dawk chhuak - tun season kal laiah Alcaraz hian French Open leh Wimbledon title a la thei, tun ṭumah pawh hian rinkai ber tia sawi a rem lo a nih pawhin a buk rit berte zinga mi chu a ni dawn.

Mahse, Paris Olympic gold medal inchuhna inkhelah Alcaraz hian Novak Djokovic a ngam lo. US Open inbuatsaihna Cincinnati Open-ah rin loh takin Gael Monfils a hneh lo bawk, hemi ṭum hian a thinrim insum zo lo chuan racket a vaw chhe hial a, a hnuah ngaihdam a dil leh hnuhnawh.

Beiseina thar nen New York khawpui a pan. US Open 2022 champion Alcaraz chuan, "Ka karek a hliam deuh a, mahse harsatna siam tham erawh a ni lo. Pangngai takin training ka nei thei, nat belh loa inelna ka hmachhawn tlang theih pawh ka beisei bawk.

"Training chu nei mah ila ka dinhmun ngai ang tak nei leh tur erawhin hun ka mamawh deuh a, tournament tak kan khelh hunah chuan 100%-in ka inpeih hman ngei pawh ka beisei," tiin a sawi a, a tir lamah harsatna tawk ve thut thei a ni tih a sawi lang tel.

French Open khelh hma khan Alcaraz hian match a khel tam lo, mahse inelna lianah a champion tho. Wimbledon hma pawhin match vawi hnih chiah a khel a, grass court inelna lianah hian a champion thei tho bawk.

Kum 21 mi Alcaraz chuan, "Hard court-ah ka inkhel tam tawk lo, hei vang hian mite chuan ka chungah rinna an nghat nasa ngam lo tih pawh ka hria. Mahse, Grand Slam hnuhnung pahniha thil thleng ang kha a thleng ve leh thei," tiin a sawi.

Osaka a inpeih

Naomi Osaka hian Grand Slam nomawi pali a chawi tawh a, chung zinga pahnih chu US Open a ni. Tun ṭumah hian a vanglaia a hun tawn ang kha tawn leh tumin New York a pan a, zanin hian a match hmasa berah seeded 10-na Jelena Ostapenko a hmachhawn ang.

Fa neih hnuah tennis khelh chhunzawm Osaka chuan, "Season hmasa khan chuan US Open ka khel thei lo a, mipui zing aṭanga entu ka ni. Kuminah chuan a kheltu zingah ka tel ve leh thei dawn ta, thil lawmawm a nih rualin chona sang tak a ni tel bawk," tiin a sawi.

Japanese star hian fa a neih avangin kum khat leh thla thum chhung tennis a khel thei lo a, chumi hnuah a lo kir leh a ni. Tennis a khelh leh hnuah ngai a la awh leh thei lo a, a inkhelh thiamna hard court-ah hian eng ang taka ṭha nge a la nih chu kan hmu ang.

Zanin hian hmeichhe world number 1 Iga Swiatek a inlan dawn bawk - Polish nula hi tun ṭumah hian seeded pakhatna pek a ni a, a match hmasa berah Kamilla Rakhimova a hmachhawn dawn a, chak tura rinkai zawk a ni ang.

Kum 23 mi Swiatek hi player ṭha tak ni mah se hard court-a inkhelh hi a harsat ṭhin, chutihrualin US Open 2022 nomawi a chawi thei tho a, a inkhelh thiam tawk lohna hmunah pawh player dangte tana hmachhawn harsa leh châkawm lo tak a ni tih a chiang.

Swiatek chuan, "Season hmasa khan chuan tournament bakah thil dang ngaihtuah ka ngah. US Open nomawi ka kawl lai hum tura beih a ngai a, chumai bakah world number 1 niha hum tura beih a ngai tel bawk, rilru kaptu lian tak pahnih a tling, kuminah erawh chutiang chu a awm tawh lo," a ti.