En châkawm SYS FC Vs Aizawl FC

Aizawl FC-in I Day Football final-ah beisei pha lo mah se LZ Juice MPL11-ah insiamṭha nghalin FC Bethlehem 6-1 in an sawp. I League club bhian vawiin dar 12:00 hian SYS FC an hmachhawn dawn a, inkhel en chakawm a tling.

Victor Lalbiakmawia kaihhruai Aizawl FC an ṭha tih a chiang a, SYS FC lakah pawh chak tura rinkai an ni. Chutihrualin AFC hian hrem vangin I Day Football top scorer Lalbiakdika an la chhawr thei dawn lo a, position ṭhenkhatah hian a ṭha ber tur an la zawng mek niin a lang bawk.

FC Bethlehem an hmachhawn ṭumin Lalruatthara bul an ṭantir bakah captain armband an hreng tir a, ISL leh I League-a tawnhriat nei ṭha player hian goal pawimawh khungin man of the match-a thlan a ni. A tawi zawngin AFC-in defence laia inkawp tur nghet hi an la nei lo niin a lang.

Tlarhma lamah pawh an ṭhat dan tur an la zawng zel a, position nghet chang tawh BD-a ber hrem a nih tak avangin bul ṭan tur ber pawh rin thiam a la har. Chutihrualin match hnuhnung berah C. Lalhriatpuia chu bench-ah awm mah se a luh hnuah goal a khung miau avangin SYS hmachhawn hunah bul a ṭan a rinawm.

SYS FC hi round 6 zawhah a sang pali zingah an tel tawh lo a, I Day Football hmalamah erawh a sang pali zingah an tel. Lunglei club hian I Day Football-ah player naupang zawk khelhtirin Ṭhuamluaia Mualah player chhawr rim zawkten training an nei thung.

Ngawrh takin training mah se SYS FC hi an chak lo nghal a, result aṭanga thlir chuan hmasawnna a awm lo angah a ngaih theih. Mahse, Chanmari nena an inkhel thlir chuan SYS FC-in hma an sawn tih a hmuh theih a, team ṭha zawk - sum hmang tam leh player tawnhriat ngah zawk lakah an tlawm mai chauh a ni.

Aizawl FC an hmachhawn lehnghal dawn avangin SYS FC tan point hmuh a harsa dawn a, chutihrualin I League club laka point an hmuh loh chuan season tawpa semifinal khelh phak a harsa dawn tih chiang takin an hria. Hemi vang tak hian Lunglei club-in I League club lakah point hmuh an tum dawn a, an game plan leh an khelh chhuah dan en a châkawm tawh hle.