Coach thar hnuaia khel tur Chawnpui FC

Chawnpui FC-in vawiin tlai dar 3:00 hian LZ Juice MPL11-ah Sihphir Venghlun FC an hmachhawn dawn a, coach thar MS Dawngliana (Valpuia) hnuaiah an khel ang.

MPL ṭan hmain Chawnpui FC hian I League-a Aizawl FC chet ṭhatpuitu coach B. Malsawmzuala an la lut a, amaherawhchu AFC B Licence coach Sawmtea hnuaiah result ṭha an nei lo. I Day Football-ah Chawnpuiin group stage an patlang lo a, Mizo club hneh an nei lo.

MPL11-ah Chawnpui hian point nga hmu tawh mah se Sawmtea hnuaia an match hnuhnung berah Ramhlun Athletic chu 4-1 ngawtin an hneh lo. Chutihrualin Sawmtea chawlh chhan erawh AFC A Licence Course atana inbuatsaih a duh vang a ni a, chumi tur chuan Aizawl West Football Academy enkawl a thlang.

Chawnpui enkawl tur Valpuia hi Aizawl FC player hlui leh tualchhung football-a tawnhriat nei ṭha tak a ni a, Sawmtea hnuaiah assistant coach hna chelhin MPL club enkawl tura pawimawh AFC C Licence a neih bawk avangin mawhphurhna pawimawh tak chelh turin club-in an ringtawk.

Valpuia enkawlna hnuaiah Chawnpuiin Sihphir Venghlun an hmachhawn dawn a, duh thlan theih chu ni lo mah se bul ṭan nana paruknaa awm mek hmachhawn chu fixture ṭhaah a ngaih theih. Sihphir Venghlun hian an match hnuhnung berah Mizoram Police 6-0 in an hneh lo a, insiamṭhat an mamawh hle.