Bethlehemin Police football an zirtir
LZ Juice MPL11-ah thilmak a thleng. Table mawngphaha awm leh chak hmel pawh la hmu lo FC Bethlehemin I Day Football champion Mizoram Police 5-2 in an sawp. Bethlehemin table mawngphaha awm chungin phase 1 khar mah se champion lai Police inkhelh an zirtir avangin lawmna tur an nei ang.
Nimin tlai inkhelah hian Bethlehem tan man of the match-a thlan Lalfamkima leh payer thar Lalnunzira Sailo ten goal hnih ve ve an khung a, Lalrammuanpuia'n freekick aṭangin goal ngana a khung. Goal nga an chhuah hnuah Police tan H. Lalbiakthanga leh F. Lalrinpuia ten khung ve mah se an mualphona a hliah khuh zo lo.
Police coach Lalbiaksanga Colney-in semifinal dinhmun a chian hma chu player enchhin nana a hman loh tur thu a sawi a, Sihphir Venghlun sawptute bawkin bul an ṭan. Mahse, Bethlehemin I Day Football champion an hlau bik lo a, goal venhim ngai pawimawh siin counter attack hmangin a chhu let.
Bethlehem coach Lalhriatpuia Sailo leh assistant coach Lalthantluanga (T2-a) te game plan a fuh a, an player thar Zira bakah midfielder Samuel Lawmsiamkima leh defender Daniel Lalliana te an ṭangkai takzet.
Chutihrualin FCB tan season liam taa Project Veng FC forward FK-a a che ṭha a, Police tlarhnungin an chelh lo. Police defender Lalhmunmawia (Ahmuntea) tihsual angin FK-a'n goal hmahruai a khung a, goal khungtu FK-a cross ṭha chu Zira'n ṭha takin a tauh lut. FK-a bawkin keeper Muanawma tihsual hmang ṭangkaiin goal ruakah a khung leh bawk.
Second half-ah FCB zawk an langsar a, Zira'n hla tak aṭangin minute 50-naah a pet goal. Minute ruk hnuah FK-a freekick hlawhchhuah chu Apuia'n a pet lut a, darkar khat a ral meuh chuan 5-0 a ni. Bethlehem player an khel ṭha vek a, goal khung lo Kiran Chettri leh keeper Bhutia Chettri thlengin an hmuhnawm.
Police-in BT-a hmangin siphurh an sut ṭhen a, injury time-ah referee duhsakna dawngin penalty hmu lehin Valpuia'n a khung a, hun a tawp zui. Police an mualpho a; August 29, Ningani chhun dar 12:30-ah an inhmachhawn lehnghal dawn. BS-a hoten phuba lak an tum ang.