Goal ruk - Chelsea fiamthu thawhna tur an ni lo!

Premier League club Chelsea-in first team player 42 ngawt an kawl avangin London club hi fiamthu thawh nan an hmang nasa. Mahse, Enzo Maresca-a'n tum fel tak a nei a, Chelsea-in Molineux Stadium luhchhuahin Wolves 6-2 in an sawp. Goal ruk hmangin Chelsea-in anmahni nuihtute an ngawihtir.

Blues tan Nicholas Jackson-a'n goal hmahruai a khung a, Noni Madueke-a'n hattrick siamin Cole Palmer-a'n goal khat a khung bakah assist 'hattrick' a nei a, player thar Joao Felix-a'n goal a khung nghal bawk. Chelsea tan inkhel duhthusam erawh a ni lo, goal ruk an khung theihna inkhelah goal hnih an chhuah.

An intum tawk

Goal riat luhna inkhel a nih miau avangin ṭan phat aṭangin inkhel a nung a, minute hnihna lekah Cole Palmer-a corner pet chu Matheus Cunha-a'n khawih pialin far post-a awm Jackson-a'n a tauh lut nghal.

Chelsea-in bul ṭan ṭha mah se an tlarhnung a pherh. Wolves defender Yerson Mosquera ball pek chu Strand Larsen-a'n goal-ah chantir mah se offside vangin pawm a ni lo. Mualneitu lamin an phu angin goal an khung tho a, minute 27-naah Blues tlarhnung chiang takin an ṭhiat a, Rayan Ait-Nouri ball pek chu Cunha-a'n chiang takin a khung.

First half tawp hma hretin player thiam bik danglamna a lang a, Jackson-a ball pek chu Palmer-a'n pet nghalin goalkeeper José Sá chu mawi zetin a pet khum. Mahse, injury time minute ruknaah Larsen-a'n si phurh a sut a, first half-ah 2-2 a ni.

Madueke hattrick

Pep Guardiola hnuaia inchher hriam tawh Enzo Maresca-a'n halftime a hmang ṭha a, Noni Madueke leh Palmer te an vul bawk. Minute 49-naah Madueke-a'n mual dinglam aṭangin a pet goal a, English winger hian minute 58-naah a khung lehnghal a, goal hnih luh dan a inang hle.

Goal thumna pawh a danglam tam lo, minute 63-naah Madueke-a'n hattrick a siam a, mual dinglam aṭanga a khung vek niin Palmer-a ball pek vek a ni bawk.

Chelsea ṭhatzia nemnghettu chu goal rukna a ni a, counter attack hmanga Wolves tlarhnung an ṭhiah dan chu a 'class' rem rem hle. Blues hian Pedro Neto tlan chakna leh tlan thiamna an hmang ṭangkai a, Portuguese midfielder ball pek chu Joao Felix-a'n minute 80-naah chiang zetin a pet lut.

Mahse maw, Blues tlarhnung erawh a la pawp hle. Goal rukna luh hma hian Mario Lemina chuan mawi zetin a volley goal a, offside vangin pawm a ni lo. Maresca hote hi goal ruk an khung vangin an lawm thei a, mah se an tlarhnung erawh inenfiah an mamawh hle.

Engtin zel?

Inkhelh zawhah Maresca chuan, "Cole Palmer hi kum nga vel chu ka lo hre tawh a, player danglam bik a ni. Goal a khung leh a assist neih vangin mak tihna ka nei lo. Chutihrualin Noni kha hattrick a siam vang chauh ni loin goal a venhim dan avang khan ka fak a, a khelhdanah ka lawm," tiin Palmer a fak a, hattrick siamtu Madueke pawh a fak tel bawk.

Mahse, Maresca erawh a ṭawng fimkhur. Chelsea boss chuan, "Squad kan neih ṭhat avangin ka lawm. Kum thum liam ta khan UCL nomawi chawi mah ila, season hnuhnung pahnihah chuan 12-na leh parukna kan ni. Tuna Premier League champion beisei emaw Champions League khelh phak emaw chu a la harsa ang," tiin ṭawng huai vanga pressure insiam a tum lo.

Chelsea hian Europa Conference League playoff an khelh avangin Premier League club dang aiin khelh tur an ngah a, Maresca pawhin an squad chhahna a la hmang ṭangkai viau.

August 29, Ningani zan dar 12:00-ah Blues-in Servette an hmachhawn dawn a, an mualah 2-0 a an hneh tawh avangin hmabak harsa tur niin a lang lo. London club hian kartawpah Crystal Palace an mikhual leh dawn a, Premier League match hmasa ber chak lo mah se match thumna zawhah chuan a sang pali zinga awm theih dan kawng a inhawng leh der tawh.