Verstappen hmaah Norris a thleng

Formula 1 season chawhnu lam an hmang ṭan leh ta - Dutch Grand Prix thlan niin, tualchhung tlangval chhuanvawr Max Verstappen hmaah Lando Norris a tlan thleng!

Zandvoort tlankawngah “Orange Army” an pungkhawm tam hle a, tlankawng sir velah serthlum rawng kawr ha an khat hneh leh hle, mipui ṭan rawn Verstappen tan a phurawm hle ang tih chu thil chiangsa a ni.

Mahse, tun hnaia hmasawn tak McLaren driver Norris chuan tun season chhunga a vawi hnih nan hnehna a chang. Dutch GP hma hian May thla khan Miami GP-ah a lo chak tawh bawk.

Khawvela car intlansiakna sang ber hi thla thar tirah an tlan leh nghal dawn. September 1, Pathianni zan hian Autodromo Nazionale Monza-ah Italian GP an tlan leh dawn a ni.

Norris-a hun

Season hmang ṭha tak mai Lando Norris hian dinhmun ṭha taka a din hnuah chetsual leh zauh a ching, tun season kal laiah pawh a hmasa ber aṭanga tlan chhuak ni chungin lap hmasa berah a hmahruaina vawi thum ngawt a hloh.

Tun ṭumah pawh a tir lamah Norris hi a tlan ṭha tawk lo a, lap 72 an tlan tur zinga 17 an tlan lai chuan a hmaah Verstappen a awm, mahse a hnuah chak tak maia tlan pelin tun season chhunga a vawi hnih nan a chak.

Dutch tlangval Verstappen a tlan ṭha viau a, theihna sang bik a nei tih pawh a lang. Amaherawhchu, tun hnaiah MacLaren hmasawnna a langsar, tun ṭum kar tawp intlansiakah pawh car an nei chak ber tih a takin kan hmu.

British driver Norris chuan, "Intlansiak duhthusam tia sawi theih chu a ni lo, a chhan chu a tir lamah ka talbuai tlat. Mahse, a tawp dan erawh duhthusama ṭha a ni leh thung.

"Ka hmaah Max a tlan a, chumi chu ka pel thei a nih chuan car ka nei ṭha hle tihna a ni mai, tuna kan car hi chu sawisel tur a awm lo," a ti. Car ṭha ringawt a tawk lo a, a khalhtu a ṭhat a ngai tel bawk a ni.

Max leh Red Bull

Season tir lamah Red Bull leh an driver ṭha bik Max Verstappen te an kal fawr hle a, tun hnaiah erawh team dangin an chhaih buai phak ta fo mai a, an insiamṭha vat lo a nih chuan dinhmun himah an awm reng bik lo mai thei.

Driver championship lamah Verstappen hian point 295 hmuin hma a hruai a, amah hnaih bertu Norris aiin point 70 ngawtin a la hmu tam zawk, a dinhmun a derthawng rih lo hle niin a lang.

Chutihrualin, Red Bull driver pakhat zawk Sergio Perez chu tun ṭum intlansiakah hian parukna a ni leh a, team championship lamah chuan Red Bull hian McLaren lakah point 30 chauhin hma an hruai mek a ni.

Red Bull team principal Christian Horner chuan, "McLaren leh Lando te ka lawmpui, tun intlansiak bik atan chuan car nei ṭha leh tlan chak ber an ni a, chuvangin hnehna changtu nih kha an phu hle.

"Tun kartawp thil thleng aṭang hian thil tam tak kan zirchhuah ngei ka beisei. McLaren car chak tak mai el phak tur khan, kan car pawh tihchak a ngaihna lai kan hriat chhuah ngei pawh ka beisei," tiin a sawi.