Leicester-in Atalanta defender lalut

Premier League club Leicester City chuan Chelsea lakah an left back duhawm Ben Chilwell chan mah se ngawi renga thlir liam an tum lo a, English defender hmun ruak hnawh khat turin Champions League quarterfinal khel Atalanta aṭangin Timothy Castagne an lalut. 

Kum 24 mi Castagne man zat hi tarlan ni lo mah se khawthlang media-te chuan pound maktaduai 22 man niin an sawi a, Brendan Rodgers-a enkawl team tan hian kum nga chhung khel turin contract-a ziak. 

Belgium tan vawi sarih inlana goal hnih khung thei defender hi left back leh right back anga chhawr kawp theih a ni a, Leicester hian inremna an neihpui tawh rualin he thu buatsaih lai hian Premier League lam pawmpuina a la awm lo thung. 

Castagne hian Atalanta tana a khelh hma hian Genk-ah a professional career kum 2014 khan ṭanin 2016-17 season thleng a khel zui a, kum 2017 khan Serie A club Atalanta hi a zawm. 

Italian club tan hian season hmasa khan inelna hrang hrangah match 33 khelin goal hnih a khungsak a, assist vawi thum a nei thei bawk.