Tennis inelna zinga sum tamna ber US Open

US Open chu nizan aṭang khan khelh ṭan a ni - New York khawpuia tennis inelna lianah hian, kumin hian lawmman atan pound maktaduai 57.8 sem ral a ni dawn, tennis tournament zinga lawmman tamna ber a ni.

Mipa leh hmeichhe singles champion ten lawmman an dawn zat hi a inang a, tun ṭumah hian pound maktaduai 2.8 an dawng dawn. Champion dawn tur hi India pawisa chuan Rs 30,18,34,980 a ni hem mai.

Tun hma chuan mipa hlawh a tam zawk ṭhin, mahse a inzat a siamrem a ni tawh. Mipa hian set nga hmangin chak zawk an zawng a, inkhelh chhung a reiin entu pawh an tam, hmeichhia erawhin set thum hmangin chak zawk an zawng thung.

Inelna tak hmachhawn phak chin, main draw khel pha hrim hrim chuan $100,000 an dawng dawn a, chak lo nghal pawhin Rs 83,84,305 an dawng phak dawn tihna a ni a, a ṭhahnem tham hle.

Chutihrualin tournament khel phak nih hi a awlsam lo, ranking sang nih a ngai. Ranking sang ni lem lo, tun hma lama US Open lo khel ṭha tawh leh, tualchhung player beiseiawm an duhsak mi tlemte hnenah wildcard pek an ni ṭhin.

Grand Slam a nih chuan player inlan an tam a, chawlhkar hnih chhung khelh ṭhin niin hun pawh a duh rei. Tun ṭumah hian tennis court hrang hrang 17 ngawtah tournament hi an khel dawn a ni.

Court zingah Arthur Ashe Stadium, Louis Armstrong Stadium leh Grandstand te chu a hmingthang zual an ni. Mipui 23,771 lenna Arthur Ashe Stadium hi a pui ber a ni a, khawvel huapa tennis court lian ber a ni - player langsar bikte an inlan ang a, a hmawr bawkna tur hmun a ni bawk ang.

Kum 1997-a sak Arthur Ashe Stadium hi US dollar maktaduai 254 man vel a ni a, khawvela tennis court changkang bik zinga mi niin, a chung khuhna a awm - ruah surin inkhel a tibuai ve ngai lem lo tihna a ni.

Grand Slam a nih tawh chuan lawmman chauh a ni lo a, ranking point pawh a tam. Champion hian point 2000 an hmu thei a, pahnihna in point 1300 an hmu thung. Major tournament dawta ngaihhlut Masters 1000 champion aiin Grand Slam-a pahnihnain point a nei hnem zawk.