Chanmari FC-in goal an surtir

LZ Juice MPL11 hmahruaitu Chanmari FC-in an dinhmun sawhnghetin nimin khan Ramhlun Athletic 6-1 in an sawp. Lalsangzuala Hmar hote hian match sarih aṭangin point 19 an hmu a, chak loh nei loin phase 1 an khar.

Nimin inkhelah Ramhluniin Felix Lalruatsanga hmangin goal khung hmasa mah se Chanmariin inkhel an thunun a, goal rukin an chhanglet. KC Malsawmsanga'n goal hnih a khung bakah Lalrinchhana Tochhawng, Lalkhawpuimawia, Moses Lalrinzuala leh Lalrokima ten goal khat ṭheuh an khung.

RG Stadium-a inkhelah hian Ramhlunin bul an ṭan ṭha a, captain Flavius Lalruatkima freekick ṭha zet chu keeper Zothanmawia'n dang perin Felix-a'n minute 11-naah a club hlui lamah a khung. Chanmari an insiamrem a, minute 21-naah Hmangaihkima corner pet chu captain Rinchhana'n a tauh lut.

First half tawp hma hretin Sawmsanga'n box chhungah rang taka inherin a pet lut a, hei hi inkhel danglamna chhanah a ngaih theih. Second half-ah Chanmariin na zawkin an nawr a, Vincent Lalduhawma leh Mapuia ten chance ṭha hlah nual mah se chance an ngah hrim hrim rah an seng.

Minute 64-naah Mapuia'n a penalty hlawhchhuah a khung a, Sawmsanga'n minute thum hnuah a khung belh. Bench aṭanga rawn lut Moses leh Rokima ten an insiamsak tawn a, inkhelh a tawp chuan 6-1 a ni.

Chanmari hian chiang taka chak phu mah se an vannei tel. First half-ah captain Rinchhana chu hnawhchhuah theih a ni a, Ramhlun hian goal chance an hlah bawk. Felix-a'n penalty a hlah bakah Benjamin Lalnunpuia'n hnai tak aṭangin a hlah. Ramhlunin point an hlawh chhuak lo a, semifinal inchuh boruak a hot phah thung ang.