Liverpool an chak leh ta

Jurgen Klopp-a chhuah rualin Liverpool an talbuai nghal dawn emaw an ti a, mahse, a ni lo - Arne Slot hoa inlan Reds hian Pathianni zan khan Brentford chu 2-0 in an hneh a, Premier League match hnih a zawnin an chak ta.

Liverpool tan Luis Diaz leh Mohamed Salah te chuan goal khat ve ve an khung a, Brentford-in a chhanletna tur an neih loh avangin Reds-in hnehna hlado an chham - match hnih an khelh aṭangin point ruk an hmu.

Nerseyside club hian an match thumna chu September 1, Pathianni zan hian Manchester United khelmualah an khel zui dawn a, Brighton & Hove Albion laka tlawm hlim Red Devils-in an hmelma kumhlun hi mikhual hma mah mah an inti mai thei!

Arne thlawpna

Anfield-a Liverpool fan-ten Klopp ngai reng mah se, coach thar Slot-a chungah rinna an nghat tih an pholang a, fans tam takin Dutch coach hming chuanna scarve an pholang a, "Arne, i kiangah kan awm reng ania..." tih chuanna pawh a langsar hle.

Liverpool player-ten an fan-te hi hlim taka auna tur pawh an pe hma hle. Minute 13-na lekah counter-attack mawi zet min chhawpsakin, Luis Diaz chuan a hmawr a bawk a, he goal luh theihna tura Diaz leh Diogo Jota intlanthelh vel chu mit titlai a tling.

Mahse, an goal khung hma ngaihtuahin Liverpool hian goal dang erawh an khung lawk thei lo a, Brentford-in an rum ṭhaih ve zeuh zeuh bawk avangin Reds fan-te an thla a muang lo.

Thlamuantu Salah

Liverpool danglamna ni ṭhin erawh Mohamed Salah an nei hi a ni - Egyptian forward hian Reds fan-te hlauhthawnna tibo turin, minute 70-naah Diaz-a siamsak chu goal-ah a chantir a, tun season-a league match hnih a khelhah goal a khung ve ve leh ta der mai.

Salah-a'n goal a khung belh meuh hi chuan chak tur a chiang tawh a tih theih a, Reds-in bench aṭanga Darwin Nunez leh Cody Gakpo an luhtir theih bawk avangin team pahnih 'class' a inthlau hret tih a lang.

Nunez leh Gakpo ten goal khungna remchang an nei zui ve ve a, mahse, an chhawr lo - Euro hmang ṭha tak Gakpo-a shot ṭha zet chu an lo dan per hnuah bar a per a, a ui vawng vawng ang.

A hmuhnawm

Klopp-a hnuaia 'heavy metal' hmuh tur awm ta lo mah se, Liverpool inkhel a hmuhnawm reng a, a bik takin counter-a Brentford an nawr let ṭhin chu a hmuhnawm - chutihrual chuan tlarhnungah rum ṭhaih an ni ve fo tho a, inenfiahna tur nei lo an ni bik lo.

Brentford tan captain Christian Norgaard chuan uiawm takin a tauh out a, Nathan Collins-a chance neih pawh Reds keeper Alisson ṭhatzia fakna a ni. Brentford-in chhuak tur anga sawi Ivan Toney tel loin a hmawr bawk an harsat.

Hetihlai hian Reds tana Andy Robertson-a chance neih vawi hnih ngawtte pawh kha sawi bo theih a ni lo a, Brentford keeper Mark Flekken chuan ṭha zetin a dansak ve ve.

Slot a lawm

Liverpool hian Brentford laka an ball pass 92% an tidik a, 2003-04 inkara mumal taka statistic record awm hnuah Premier League match-a pass dik percentage an neih san ber ṭum a ni.

Ipswich Town lakah khan an khingpui box-ah vawi 50 ball khawih an nei a, 2008-09 a Opta in a chhinchhiah ṭan aṭangin manager thar hnuaia match hmasa bera khingpui box-a ball an tawh tam ber a ni.

Slot chuan, "Tun anga ṭhaa bul ṭan tur hian thawhrim a ngai hle. Kan result avangin kan phur takzet a, team ṭha tak pahnih kan hneh a ni. A bik takin Brentford hian kar hmasa khan an khel ṭha a, kan hneh thei - hetihrual hian hmasawnna tur erawh tam tak a la awm," a ti.

Chhungkua

Slot chuan, "Liverpool ka pan hma khan he club hi chhungkua ang mai an nih thu min hrilh - a lo dik takzet a ni. Fan-ten team khel ṭha hi chu hmuhnawm an ti a, rim taka an thawk lai hmuh an duh bawk.

"Kei pawh ka thil hmuh khan min tilawm a, keipawh ka lawm chuan fans tam zawk an lawm ang. Kan tan ni duhawm tak a ni," a ti a, Dutch coach chuan player-te fak zuiin, "Ṭum danga kar hnih chawl ṭhin kha kar thum an chawl a, mahse, an lo kir meuh chuan an inpeih em em si.

"Heti taka ṭhaa an lo kir avangin player-te ka fak a, ka enkawl hma nen khan thil kan thlak danglam tam lo a, player tan pawh a harsat loh phah a ni," a ti a, Klopp-a sulhnu an chhui thu a sawi.