Real tan Endrick-a'n goal khung nghal

La Liga champion Real Madrid chu tun season-a a vawi khat nan league-ah an chak ve ta a, Real Valladolid chu 3-0 in an hneh - Madrid khaw club tana a match hmasa berah Endrick chuan goal a khung nghal a, Kylian Mbappe erawhin La Liga-a goal khung turin a la nghah zel a ngai thung.

Real tan Endrick-a khung hma hian Federico Valverde leh Brahim Diaz te chuan goal khat ve ve an khung bawk a, Real tlarhma ṭhatzia sawi nana lam Mbappe, Vinicius Jr leh Rodrygo te hming a lang ve lo.

Santiago Bernabeu-a inkhelah mikhual Valladolid an fimkhur takzet a, 4-1-4-1 a inremin, tlarhnungah an inhnawh tlat avangin Real tlarhmaten an su hawng hleithei lo a, match hmasa bera Real Mallorca inhnehtawkpuitu Real hi an chak zo lo leh mai dawn niin a lang hman.

Mahse, chawlhlawk hman a nih hnuah Real an danglam a, mikhual laka chak zawh loh an duh lo. Second half ṭan aṭanga minute ngana lekah Federico Valverde chuan hmahruaina goal a khung a, Bernabeu thawm a ṭha takzet.

Real-in an duhtawk mai lo - hun tawp nan minute hnih chiah a awm tawh tihah Brahim Diaz chuan a khung ve leh a, hun pek belh minute ruknaah Endrick chuan a khung bawk. Real player a nihna anga phochhuah a nih hmasak bera a mittui hial tla Endrick tan chuan zan danglam bik a ni.

Kum 18 mi Endrick hian December 2022 khan Real zawm turin Spanish champion hi inremna a neihpui tawh a, mahse, FIFA danah kum 18 tling lo player tan ram pawnah khelh theih a nih loh avangin July thla khan Real hi a zawm ve chauh.

Palmeiras striker hlui hian kum 20 em pawh la tling lo mah se, football ram ropui Brazil tan match 10 ngawt khelin goal thum a khung der tawh a, a chesual viau a nih loh chuan Real tan player pawimawh ni chho turin theihna a nei.

Real ṭantute khawhnarna erawh Jude Bellingham hmel hmuh tur awm lo chu a ni. Season hmasaa La Liga leh Champions League nomawi an chawi nana player pawimawh hi training-naah a inhliam a, a ke dinglamah tihrawl hliam a nei - September thla laihawl thleng a chawl ang.

Hetihlai hian Atletico Madrid chuan season hmasaa beisei phak baka che ṭha Girona mikhualin, 3-0 in an sawp ve bawk a, Antoine Griezmann, Marcos Llorente leh Koke ten goal khat ṭheuh an khung - Julian Alvarez-a'n bul ṭan mah se goal a la keng tel lo a, Chelsea aṭanga an lakluh Conor Gallagher chu minute 58-naah luhtirin, Spanish club tana a match hmasa ber a khel bawk.