Bayern an chak hram

Coach thar Vincent Kompany hnuaia an match hmasa berah Bayern Munich-in chak turin vanneihna an mamawh a, minute 82-naa Serge Gnabry-a goal hmangin VfL Wolfsburg chu 3-2 in an hneh - insiamṭhat ngai a awm nghal nual!

Mikhual khelmualah Bayern-in goal an khung hma a, Sacha Boey-a'n Wolfsburg tlarhnung a pal darh hnuah Jamal Musiala tan siamsakin, Germany international hian minute 19-na lekah hnai tak aṭangin goal a khung.

Mahse, Bayern hlim chhung a rei lo. Wolfsburg tan Lovro Majer chuan goal hnihin a chhanglet a, 2-1 a ni daih! Bayern tana goal hmahruai hlawh chhuaktu Boey chu Tiago Tomas lakah foul-in penalty a chawi a, minute 47-naah Majer chuan goal-ah a chantir.

Hetah hian an la tawp mai lo. Kim Min-Jae a tihsual zarzotu Patrick Wimmer-a siamsak chu Majer bawkin awlsam takin goal-ah a chantir a, rin loh zawkin 2-1 in hma an hruai daih.

Bayern tan a match 709-na khel turin Thomas Muller luhtir a ni a, German club tana inlan hnem ber record siam nghaltu hian goal a hlawh chhuak - Muller-a tihbuaina kal zelah Jakub Kaminski chuan an lamah tilutin, Bayern si phurh a sutsak a, Gnabry-a'n Harry Kane-a siamsak chu goal-ah a chantir zui.

Gnabry hi a vanneih zan ni ngat se, hei aia tam zawk goal khung thei a ni. Mahse, Wolfsburg keeper Kamil Grabara a che ṭha tlat a, Gnabry chance vawi tam a tihthlawnsak - Polish keeper hian Kane-a khung ngei tur nia lang a dansak bawk a, a tawpah erawh team ṭha zawk Bayern an chak ta tho.