Conte enkawl Napoli an chak

Antonio Conte chuan Napoli a enkawl hnua a vawi khat nan Serie A-ah hnehna a chang. Pathianni zan inkhelah Naples club hian Bologna chu 3-0 a hnehin point thum hlu tak an hlawh chhuak.

Italian manager Conte naute hi an match hmasa zawkah an chak lo a, insiamṭhat an ngaih nasat thu a sawi. Diego Maradona Stadium-ah erawh thawnthu a danglam ta; Giovanni Di Lorenzo, Khvicha Kvaratskhelia leh Giovanni Simeone te chuan goal khat ṭheuh khungin an team an chakpui.

Napoli hi 2000-01 season khan Zdenek Zeman kaihhruaina hnuaiah, season tir lam an league match hmasa pahnihah an tlawm a, a hnu lamah chuan hetiang record duhawm lo hi an la nei zui leh rih lo.

Kum 55 mi Conte chuan, "Team inkhairual leh tih tur chin hre tak Bologna kan hmachhawn a, si thum faia kan chak thei a nih chuan ka nauten an khel ṭha hle tihna a ni mai a, lawm tur pawh kan ni.

"Hun rei tak chhung Maradona Stadium-ah hian Serie A match kan chak tawh lo tih ka hria, kan beisei leh ngen ang ngeiin fans lam pawh player 12-na leh player 13-na hial an rawn ni thei, kan thawhhona vangin kan chak," a ti.

March thla hnua a vawi khat nan Napoli hian anmahni khelmualah ngei Serie A match bikah hnehna an chang ve leh chiah a ni.

Conte-a'n a squad thuam chhah a la tum mek zel, tun hnai khan Manchester United aṭangin midfielder Scott McTominay chu lalut turin inremna an nei tawh, pound makatduai 25.4 sengin an lalut dawn a, tunkar chhungin contract an ziah fel hman a rinawm.