Community Shield Premier League champion hmaah FA Cup champion

Premier League an khelh zawh aṭangin ni chauh a la 33 liam a, Champions League final hnuah phei chuan ni ruk chauh a la ral. Zanin dar 9:00 hian English football chu season thar atan a lo kir leh tawh dawn.

Liverpool leh FA Cup champion Arsenal ten Wembley Stadium-ah Community Shield an inchuh dawn, season thar khuhhawnna hi a hmunah entu awm thei dawn lo mah se a hmuhnawmna a nep chuang lo ang - English football ngainatute tan TV hmaa ṭhut hun a ni.

Community Shield hi 1908 aṭang khan an khel a, season thar khuhhawn nana hman ṭhin a ni. Jurgen Klopp-a nauten 2019 June thla hnua an title pangana an beisei mek, manager Mikel Arteta tan erawh dai ngai loh ram a la ni zel.

Gunners leh Reds te hian Community Shield hi vawi 15 ve ve an chawi tawh, an chungah hian vawi 21 chawi tawh Manchester United an awm. Zanina chak zawk chuan United an hnaih bakah an elpui team pakhat chu an kalpel dawn tihna a ni.

Premier League champion Liverpool leh pariatna Arsenal ten season hmasa league bika an point hmuh inthlauhna chu point 43 teh meuh a ni a, an inthlauhna hi club vantlang pawlin season tluana an point hmuh zat vel a ni hial!

Jurgen Klopp kaihhruaina hnuaiah Reds hian hnehsawh takin nomawi an chawi. Paris Saint-Germain, Bayern Munich leh Juventus ten an ram league an chawi aia awlsam zawkin Liverpool hian EPL an chawi thei - league hautak ni ṭhin chu an hnehsawh hle.

Arsenal-in harsatna leh buaina hrang hrang karah Klopp-a naute hmasawnna an thlir a, anmahni anga awm ve an duh. Arsene Wenger chhuah hnuah Unai Emery an lalut a, Spanish manager hian an beisei ang chhanna a pe thei lo.

Mikel Arteta hmel a rawn lang a, Manchester City assistant manager hlui hian team enkawl lamah tawnhriat nei tam lo mah se Gunners chu phurna a siamsak. Season chawhnu lamah danglamna siamin FA Cup champion hial an ni thei, an beisei 'Klopp-a Liverpool' ang khan 'Arteta-a Arsenal' an indin mek.

Arsenal ṭantu ten Mikel Arteta enkawlna hnuaiah beiseina an nei a, an beisei ang ngeiin danglamna a thleng, he danglamna leh phur tharna hi 'Arteta Effect' tiin an sawi ṭhin, season tawp a an hlimna ang kha season tharah neih chhunzawm an tum dawn.

Arteta chuan, "Mi ṭhenkhat chuan 'kan khelh fuh ni chuan team lian pawh hneh thei kan ni' tih hi an sawi ṭhin, kei chuan hetiang thu sawi hi ka duh ve lo. Team lian tum turin kan inpeih a, hnehna chan zel kan tum bawk, tih hi ka naute rilru put dan tura ka duh chu a ni," tiin a lo sawi tawh.

Community Shield chungchang sawiin Arteta chuan, "Team ṭha tak nen inhmachhawnna hun kan nei leh dawn, eng inkhelah pawh hnehna chan theihna kawng a awm a ni tih kan hriat nawn a pawimawh a, beiseina kan nei reng tur a ni.

"Manchester City leh Chelsea kan hmachhawn dawn khan mi tam tak chuan chak lo turah min ngai, an ngaihdan kha sawiselsak ngawt chi a ni lo. Keini chuan thil tih hmangin kan lantir zawk, tumna leh beiseina a awm chuan kawng a inhawng ṭhin," tiin a tir aṭanga dawih zawk nih ngawt a tum lo.

German manager Jurgen Klopp-a'n a tum ram thleng tura rilru a sen nasat ṭhin zia leh a tih takzet ṭhin zia chu sawi nawn a ngai lo. Kum 30 chhung an nghah tawh league nomawi an chawi theih nana Sadio Mane, Mohamed Salah leh Roberto Firmino te a hman thiamzia pawh hriatsa a ni.

Liverpool hian an hmatawng pathum hi an hmachhuan tur an ni leh dawn, hliam leh harsatna dang a awm a nih ngawt loh chuan an inlan rual ṭhin - zaninah pawh an hmel hmuh beisei ila a sual lo ang. Tlarhnung remphui hleithei lo Gunners tan an tawrhhlelh awm leh khawp ang.

Virgil van Dijk leh goalkeeper Alisson te an awm chuan tlarhnung lam an thlamuang ṭhin, an theihna san bakah an uapna hnuaiah player dangten inrintawkna an neih phah ṭhin, team tan innghahna an tling takzet - Arteta naute tan pawh awlsam taka paltlang theih an ni dawn lo.

Player leh season liamta an hman dan thir chuan Liverpool hi zaninah pawh chak zawk tura rinkai an ni. Chutih rualin Arsenal pawh an phur lai tak a nih avangin chungnung zawk thei an ni, attacking game khel thiam pahnih an nih avangin inkhel hmuhnawm a beisei ngam ang.

Manager tam tak chuan Community Shield hi an player thar enchhin nan an hmang fo a, season thar atana in enchhina a nih avangin kuminah pawh club pahnih hian hmel thar an chhawp chhuah ngei a rinawm.

Liverpool hian league nomawi an chawi hnuin bazarah thawm an nei lian hran lo, Olympiakos aṭangin defender Kostas Tsimikas an lalut. Ani hi Andy Robertson thachhang dawltu tur a ni dawn, zaninah a inlan a nih pawhin a khelh tluan a rinawm loh.

Klopp-a'n player lalut hnem lo mah se a neihsa a chelh vek avangin transfer bazar ṭha tak a hmang tih pawhin a sawi ngam. Captain Jordan Henderson leh Alex Oxlade-Chamberlain chu inlan thei lo tur langsar an ni, friendly match an khelh hnuhnung ang bawkin player ṭha an lut ang.

Liverpool hian friendly match-ah Vfb Stuttgart 3-0 in an hneh a, an match hnuhnung zawkah erawh Red Bull Salzburg nen 2-2 in an inhnehtawk. Klopp-a hoten Community Shield chawi turin an match hnuhnung ber aṭangin insiamṭhat an mamawh ang.

Arsenal hian season hmasa lama pound maktaduai 27 senga an lei William Saliba an chhawr thei tawh a, defender thar hi MK Dons nen friendly match an khelh ṭumin ṭha takin a inlan tawh - zaninah pawh inlan tura ngaih a ni. Chelsea chhuahsantu Willian pawhin North London club tana a match hmasa ber a khelh a rinawm.