Champion thei kan tam - Conte

Inter Milan manager Antonio Conte chuan Serie A champion thei an tam thu a sawi a, league nomawi chuh zinga an tel ve chuan a tih lawm thu a sawi bawk. Inter hian Pathianni zan dar 7:30-ah Spezia an mikhual ang.

Juventus chuan tun hnai season kua ngawt league nomawi an chawi, season kal laiah pawh Old Lady hi rinkai an la ni reng. Mahse hneh loh nei loa kaltuang AC Milan chu hmahruaitu an ni a, pahnihna pawh Inter an ni - Bianconeri hi pathumna an ni mek.

Conte chuan, "Kan dinhmun ka thlir a, champion tura rinkai leh nomawi chuhtu zinga kan tel hian min ti lawm. Team zawng zawngin tum neiin season bul kan ṭan vek a, keini pawhin hlawhtlin ngei kan tum.

"Ka hmuh dan chuan league champion ni thei hi tam tak an awm. Juve, Milan leh Inter bakah hian Napoli leh Atalanta pawh sawi hmaih theih an ni lo. Hri lengin harsatna a thlen theih reng bawk avangin kawngka zau takin a inhawngah ka ngai," a ti.

Season hmasa khan Inter hi pahnihna an ni, champion Juventus an phak lohna chu point khat chauh a ni. Mahse Old Lady hi khelh hmabak pahnih nei chungin an champion a, nomawi an chawi chian hnua point an hloh avangin Inter hian an hnaih chauh.

Kuminah pawh team pahnih hi an inel leh ngei dawn. Manager tawnhriat nei lo Andrea Pirlo-a'n a naute chakpui pup pup lo mah se tlawm nei loin an la kaltluang thei a, an thiampuipa Cristiano Ronaldo a la fit ṭhat avangin rinkai ber anga sawi theih an la ni.

Juve hian zanin dar 1:15 hian Parma an lenchilh dawn.