US Open khelh tur tichiang

Harsatna hrang hrang karah US Open chu khelh a ni dawn, hard court inelna lian hi August 31, Thawhṭanni zing aṭangin Flushing Meadows, New York-ah an khel ṭan ang - player inhmachhawn dan tur pawh tihchian a ni tawh.

World number 1 Novak Djokovic leh champion tura rinkai zinga mi Dominic Thiem te chu an kalkawng a inang dawn lo a, final hma chuan an inhmachhawn thei lo ang; player pahnih hian final lut se tih chu tennis fans duhthusam a ni ang.

Grand Slam vawi 17 champion tawh Djokovic hian a match hmasa berah Damir Dzumhur a hmachhawn dawn a, Thiem erawhin Spanish player Jaume Munar chu a bul ṭan nan a hmachhawn ve thung dawn a ni.

Season hmasa finalist Daniil Medvedev chu seeded pathumna pek a ni a, rawlthar beiseiawm Stefanos Tsitsipas chu palina niin a hnungah Alexander Zverev a awm thung. Wildcard hmanga inlan Andy Murray chuan nikum Australian Open hnua a Grand Slam hmasa berah Yoshihito Nishioka a tum dawn.

German tlangval Zverev hian a match hmasa berah service nei ṭha tak Kevin Anderson a hmachhawn a ngai dawn. South African tlangval hian 2017 US Open final kha a thleng thei hial a, a awlsam dawn lo - first round inkhel tur zinga ngaihven hlawh a ni.

Covid-19 vangin US Open hi a hmuna entu an awm dawn lo, hrileng vangin champion lai Rafael Nadal a inlan dawn lo a, player ropui Roger Federer chu hliam vangin a inkhel thei dawn lo bawk. Anni pahnih an awm loh chuan Djokovic tan kawng a awlsam deuh tura ngaih a ni, player dang tan beisei a san phah bawk ang.

Djokovic chuan, "Rafa leh Roger te hi tennis tan chuan mi bik an ni a, an awm lo tur hi an hmunruak a zau dawnin an ngaihawm hle ang. Anni pahnih bakah Stan Wawrinka a tel thei dawn lo bawk, chutihrualin player ṭha dang erawh an tel thei vek dawn.

"Thla nga chuang inkhel mumal loin kan awm a, tun hnaiah kan khel ve leh ṭan chauh. Tu tan pawh champion theihna kawng hi zau takin a inhawng niah ka ngai," a ti. January thla khan Djokovic hian Australian Open nomawi a lo chawi tawh bawk.

Hmeichhe player ranking sang zual 10 zinga paruk an inlan dawn lo a, Czech Republic nula Karolina Pliskova chu seeded pakhatna pek a ni, first round-ah Ukraine player Anhelina Kalinina nen an inkhel ang.

Grand Slam nomawi 24-na beiseitu Serena Williams chu seeded pathumna pek a ni. American star hian Grand Slam final a khelh hnuhnung pathumah hlawhtlinna a chang zo lo a, kuminah beiseina thar nen US Open a khel dawn.

World number 1 Ashleigh Barty, Simona Halep (2), Elina Svitolina (5), Kiki Bertens (7), Belinda Bencic (8), champion lai Bianca Andreescu leh 2004 champion Svetlana Kuznetsova te an inlan dawn loh avangin hmeichhe inelna hi season dang angin a ropui thei dawn lo.