An ramah Antonsen a champion

Badminton inelna Denmark Open khelh zawh takah Anders Antonsen a champion, tualchhung tlangval hian a naupan laia a ṭhianpa Rasmus Gemke chu 18-21, 21-19, 21-12 a hnehin nomawi a chawi.

Denmark tlangval pahnih inkhel hi an inhnehtawk hle, game khat ve ve an lak hnuah a chak tur zawk chinfel a ngai. Game hnuhnung berah erawh Antonsen a chungnung viau, a khingpui hi point 12 chauh hmuhtir chungin a chak.

Hmeichhe inelna lamah attacking game hmuhnawm kheltu Carolina Marin a chak zo lo, Spanish star hi Nozomi Okuhara lakah 21-19, 21-17 in a chak lo. Japanese nula hian mahni inveng tak chungin a khel thung a, a khingpui tihsual aṭangin point a khawl khawm hnem viau.

October 13-18 chhunga inelna neihah hian Indian player Kidambi Srikanth pawh a inlan a, world number 1 hlui hi quarterfinal-ah a tla. PV Sindhu leh Saina Nehwal te erawh coronavirus len hnuah an la inkhel leh lo.