Champion lai Djokovic a nghet tawk

Novak Djokovic chuan US Open nomawi a kawl lai humhim ngei a tum - nimin zing khan New York khawpuiah inelna bul a ṭan leh ta a, a match hmasa berah Radu Albot chu straight set hmangin a hneh.

Kum 37 mi Djokovic hian Radu Albot hi darkar hnih leh minute sarih chhung lekin 6-2, 6-2, 6-4 in a hneh a, second round-ah chuan Laslo Djere a hmachhawn leh ang, world number 105 hian Jan-Lennard Struff chu set nga an khelh hnuah a lo hneh ve thung.

Title 25?

Djokovic hian Grand Slam nomawi 24 a nei tawh a, mipa zingah amah tluktu an awm lo - Rafael Nadal aiin title pahnihin a nei tam. Hmeichhe legend Margaret Court nen an intluk mek, khum turin tun inelna hi a tan a pawimawh.

Tun hnai season 10 chhung chu Djokovic hian major title eng emaw ber chu a la ziah, kuminah erawh Australian Open, French Open leh Wimbledon a khel tawh, a la lo vek thung - a tan thil a awlsam vek bik tawh lo.

Kum 37 mi Djokovic chuan, "Zan boruaka inkhelh hi a nuam ka ti, khaw lum lai phei chuan a nuam zual. Mahse, tun ṭum ami ang em ema tlai ni lo se chu duhthusam," a ti. US leh Mizoram hi khawvel pangkhing lehlama awm kan ni, keini lama nimin tuk ṭhuan eikham hun angah khan Novak te hi an inkhel zo chauh.

Tun hmain Djokovoa-a unau Djordje leh Marko te chuan Radu Albot hi an lo ngam lo tawh, an intawn ve hmain Djokovic chuan phuba laksak a duh thu fiamthuin a sawi a, an inkhelh vawi khatnaah ani chuan a hneh nghal a ni.

Serbian star hian major title nei tam mah se a tan chuan Olympic gold medal a hlut ber thu a sawi tawh a. Paris khawpuia gold medal a lak aṭanga ni 23 a liam leh hnuah inelna hmachhawn leh chauh ni mah se, harsatna nei loin a tlang ta tho.

Thiem tawpna chu

Dominic Thiem hi player ṭha leh thiam bik zinga mi a ni a, a vanglaiin player ṭha an tam avangin Grand Slam nomawi chawi tam erawh a harsa - US Open title pakhat nen tennis a mangṭha dawn ta a ni.

Austrian star hian kumin May thla khan tun season tawp rualin tennis a chawlhsan tur thu a sawi a, chuvangin US Open hi a tan Grand Slam a khelh hnuhnung ber a ni ta - nimin zing khan inlanin Ben Shelton lakah 6-4, 6-2, 6-2 in a chak lo.

Thiem hian Flushing Meadows-ah hian kum 2020 khan Alexander Zverev hnehin nomawi a lo chawi tawh, a hun liam hnu sawiin Thiem chuan, "He hmunah hian tennis ka khelh chhunga ka hun ropui ber chu ka lo tawng tawh a, chuvangin ka tana a hlutzia hi sawi sen a ni lo ang.

"Nomawi ka chawi kai khan Covid-19 len lai a ni a, a hmunah entu an awm lo. Tunah erawh Arthur Ashe Stadium chhungah mipui an awm a, hun min hmanpui avangin ka lawm," a ti a, stadium chhunga mipui te lawm a hlawh hle.

Thiem chuan sawi zawmin, "A tawp nana US Open ka khel leh thei hi ka lawm a, kum li liam taa thil thleng te kha ka ngai hle. Min thlawp tute hian kha tih laia ka hlimna kha min hriatchhuah tir a ni," a ti. Tennis season a la zo lo a, inelna dang erawh a la hmachhawn thei dawn a ni.

Zverev leh midang

Alexander Zverev hian Grand Slam final a lut fo a, nomawi erawh a la chawi lo - US Open 2024 pawh hi rinkai ni chungin a khel leh a, a bul ṭan nan a khingpui Maximillan Martener lakah fiahna paltlangin 6-2, 6-7 (5-7), 6-3, 6-2 in a chak.

Seeded palina Zverev hian hnehna chang turin a khingpui service vawi ruk a chhuhsak a, aces vawi 21 a siam bawk. Hnehna chang tur hian darkar hnih leh minute 53 a hmang a, champion tur chuan inelna tir lama thahrui hman tlem dan a ngaihtuah a ngai dawn.

Tun season kal lai bikah Grand Slam match 18 khel tawhin vawi 15 a chak tling ta chiah a, vawi thum a tlawm tawh thung. Second round-ah chuan Adam Walton hnehtu France tlangval Alexandre Muller a hmachhawn leh ang - Zverev tan hna harsa tak a ni lo tura ngaih a ni.

Inkhel dangah Diego Schwartzman chu Gael Monfils lakah 6-7(2), 6-2, 6-2, 6-1 in a chak lo. Argentine tlangval, a vanglaia world number 8 pawh lo ni tawh hian nakkum February thlaah tennis a chawlhsan dawn, chuvangin atan US Open a khelh hnuhnung leh tawpna chu a ni nghal.

Player langsar dang inlan zingah seeded 15-na Holger Rune chu Brandon Nakashima lakah 6-2, 6-1, 6-1 a chak loin first round-ah a zinkawng a tawp nghal a, tualchhung tlangval Frances Tiafoe erawhin Aleksandar Kovacevic lakah set khat hloh mah se second round a inhlangkai thung a ni.