SYS tan Aizawl FC an lian mah mah
LZ Juice MPL11-ah Aizawl FC-in team ṭha an ni tih nemnghetin nimin khan SYS FC 3-0 in an hneh a, phase 1-ah point 17 hmuin hneh loh an tawng lo. Tun season MPL-ah league champion tan lawmman a awm dawn a, I League club hian Chanmari FC aia point hniha an hmuh tlem avangin pakhatna ni tur chuan hmasawn hret a ṭul ang.
Nimin inkhelah Aizawl FC tan C. Lalhriatpuia'n goal hnih a khung a, substitute Malsawmzuala Tlangte-in goal khat a khung a khung leh bawk. AFC leh SYS FC te hi August 30, Zirtawpni tlaiah an inkhel lehnghal dawn a, Lunglei club tana point hlawh chhuak tur chuan insiamṭhat an mamawh hle.
AFC tan C. Hriata
Chhun pachanga khelh an nih avangin fitness nei ṭha SYS FC-in beiseina sang tak an nei a, mahse Aizawl FC-in bul an ṭan ṭha. Winger tlan chak Augustine Lalrochana cross chu C. Hriata'n minute hnihnaah a tlawh lut nghal.
SYS FC insiamrem tum mah se defender C. Lalduhawma a chesual a, box chhungah AFC striker C. Hriata a pass. Farkawn tlangvalin a vanneihna hmang ṭhain awlsam takin minute 19-naah a khung.
C. Hriata'n MPL11-ah goal nga a khung a, hattrick siamna remchang a nei. Aizawl FC striker hian hun ṭha dang nei mah se a hmang ṭangkai thei lo. C. Hriata hian minute 90 chhungin goal attempt vawi kua a nei a, finishing ṭhat tawk loh bakah goalkeeper Joseph Laltluangpuia'n a dang ṭha ṭhin bawk.
SYS an patuai
SYS FC-a player rinrawlten I Day Football pawh khel loin Lungleiah training an nei a, Chanmari FC hneh loin bul an ṭan. Coach Lalmuankima hote Chanmari lakah khel ṭha viau mah se Aizawl FC lakah erawh an khel ṭha lo.
Lunglei club hian 2-0 a nih laiin siphurh sutna remchang an nei ngei a, captain Lalruatsanga'n goal ban a pet per a, midfielder Ricky H. Vanlalhriatsanga pawhin goal ruakah a pet goal lo. Chutihrualin Ricky hi dem theih a ni lo a, a petna hi a hla.
Second half-ah SYS FC an insiamrem thei lo a, an chance neih angte an hmang ṭangkai lo. Goalkeeper Lalhriatpuia tan hna harsa a awm lo a, Aizawl FC keeper Hriatpuia'n awlsam takin a man. SYS tlarhma lam an patuai deuh a, I League club tan defender Lalruatthara leh a hote an khel ṭha ve bawk.
Kawng dik zawh AFC
Aizawl FC-in Covid-19 hnuah nomawi an a chawi lo a, MPL11 champion an tum bakah league champion nih an tum bawk. SYS FC lakah pawh duhthusama ṭhain khel lo mah se nuam sain an chak a, substitute Sawma Tlangte-in chak nemnghetna goal a khung.
Santosh Trophy leh National Under 20 C'ship-a Mizoram winger pawimawh Sawma Tlangte-in Aizawl FC tan khelhna hmun chan a la harsat a, nimin inkhelah pawh che ṭha tawk lo mah se goal a khung. Sawma hi SYS chhuak a nih avangin a goal khung hi a lawm duh lo.
AFC coach Victor Lalbiakmawia chuan, "Kan khel ṭha tawk lo a, chutihrualin an khelh ṭhat loh ṭuma goal thum khung a, point thum hlawh chhuah bakah goal chhuah loh hi result ṭha a ni," tiin Vanglaini a hrilh. I League club hian phase 1-ah hneh loh an tawng lo a, I Day Football-ah champion zo lo mah se pakhatna ni thei turin kawng dik an zawh.