Sihphir Venghlunin semifinal beiseina chhi nung

LZ Juice MPL11-ah Sihphir Venghlunin nimin khan Chawnpui FC 2-0 in an hneh a, point kua hmuin panganaah an inhlangkai. Sihphir Venghlun hi panganaah awm mah se pathumnaa awm Mizoram Police nen an point hmuh zat a inan avangin semifinal kawng a inhawng zau hle.

RG Stadium-a inkhelah Sihphir Venghlun tan Lalthanpuia (Tepuia) chuan goal hnih a khung a, man of the match-a thlan a ni. Chawnpuiin coach thar MS Dawngliana (Valpuia) hnuaiah chak hmel an hmu lo a, MPL9 champion hi season liam taa enkawltu Lalrindika Hmar nen sawizawm an ni.

Chawnpuiin bul an ṭan ṭha a, captain David Laltlansanga'n chance ṭha a hlah. Sihphir Venghlun erawhin hun ṭha an bawhpelh lo, vei lam aṭanga Lalbiakzuala cross chu Tepuia'n minute 33-naah a tauh lut. SVFC an khel ṭha hret a, midfielder BZ-a a khel ṭha takzet.

Minute 89-naah Sihphir Venghlun substitute Malsawmtluanga Pautu ball pass ṭha chu Tepuia'n cool takin a khung a, 2-0 in hnehna an chang. Chawnpuiin point an hlawhchhuah loh avangin relegation zone-ah an awm mek a, Sihphir Venghlun erawh panganaah awmin semifinal beiseina an nei thung.