Chanmari club FZ FC an champion

BR Studio MFA Futsal Divison One Cup 2024-ah Chanmari club FZ FC chuan Tuikual Nrth club GO FC hnehin an champion. Thawhṭanni zan khan R. Dengṭhuama Stadium-ah final hi khelh a ni a, hun pangngaiah 3-3 a inhnehtawkin extra time-ah Chanmari club tan Jonathan-a'n chakna goal khungin hattrick siamna goal ni bawk.

Division One-ah hian team 32 an awm a, group pariatah team pali zela ṭhendarh an ni. Champion team FZ FC hi Zarkawt Mustangs, Bernard FC (Dinthar) leh Exalos FC (Dawrpui VT) awmna group aṭangin an paltlang a; quarterfinal leh semifinal-ah Muthi FC leh Kulikawn FC te an hneh.

FZ FC hi Chanmari FC leh Aizawl FC defender hlui Thomas Lalengkima enkawl a ni a, Thakthing pa hian MFA Futsal League Season 5-ah Thlangtiang FC a champion pui tawh bawk. Thomas hian tun hnai mai khan AFC Futsal Coaching Level 1 ṭha takin a pass a, course instructor hi futsal national head coach Joshuah Vaz a ni .