Chelh rual lohin Sven a liam ta...

"Engmahin tihnual che u suh se la, hlim takin nui zawk rawh u..." tiin tun thlatir khan football coach ropui Sven-Goran Eriksson chuan hringnun mangṭhana thu a sawi a, vawiinah chuan thlanmualah thlah liam a ni ta.

Lazio vanglaia an coach, England coach lo ni tawh bawk Eriksson chuan June 26, Thawhṭanni khan khawvel mangṭhain, thawhlehna ni nghak turin a muhil ta - kum 76 mi a ni a, football khawvelin a hre reng tawh ang.

Eriksson hian January thla khan cancer natna a neih thu khawvel hriatah a puang zar a, "Ka vanneihna a san viau chuan kum khat vel chu hun ka la nei ang," a ti a, a tawpna tur a hnaih tawh thu a sawi. A hun a lo thleng ta a, football khawvel a ṭap.

Sven-a fate, Lina leh Johan chuan an pa thih thu hi puangin, "Kan pa Sven-Goran Eriksson chu Bjorkefors, Sunne-a a inah thlamuang takin a chawl ta. Hun rei tak chu huaisen takin a natna nen khan an inbuan a, tunah chuan a thlah fel ta," an ti.

Mangṭha Sven

Sven-Goran Eriksson hian club 12 ngawt a enkawl hman a, heng zingah hian Benfica, Manchester City, Leicester City, AS Roma leh Lazio an tel a, nomawi 18 a chawi - international football-ah Mexico, Ivory Coast leh Philippines a enkawl hman bawk.

Eriksson hian an ram club IFK Goteborg aṭanga a hming chher ṭanin, kum 1982 khan league leh UEFA Cup champion a nih kawp pui thei a, a record a ropui hle. An ram pawn club a enkawl hmasak berah Benfica chu league nomawi pathum a chawipui bakah, European Cup leh UEFA Cup-ah te final a luhpui ve ve thei.

Lazio chu 1997-2001 inkar kha enkawlin, an club vanglai tak a tawnpui a, Serie A (1), Coppa Italia (2), Supercoppa Italiana (2), UEFA Cup Winners' Cup (1) leh UEFA Super Cup (1) nomawi a chawipui a, kum 1998 khan final a luhpui bawk.

England chu kum nga zet kaihruaiin, major tournament quarterfinal vawi thum a hruai thleng a, a hun tawp lamah India nen pawh sawizawm a lo ni tawh - kum 2019-a AIFF-in Igor Stimac an rawih dawn khan Blue Tigers enkawl thei zinga sawi rik a ni a, a enkawl ta lo thung.

Sulhnu leh lunglen

Eriksson hi Liverpool fan ruhkawl a ni a, a natna puan a nih khan Reds kaihhruai a châk ṭhinzia a sawi chhuak. March 2024 khan Liverpool chuan Erkisson-a duhthusam an tihhlawhtlinsak a, Liverpool legends leh Ajax legends inkhelah coach atan an hmang a, Anfiled-a inkhelah 4-2 in a team a chakpui.

Liverpool chuan, "Sven, thlamuangin chawl ang che. Liverpool chuan Sven-a chhung leh ṭhianṭhate he hun harsaah hian a hre reng a ni," an ti a, Reds legend Steven Gerrard chuan, "Sven a liam thu ka hriat chuan min tinguai hle. Pa ṭha leh nelawm tak a ni a, a chhungte leh ṭhiante ka tawrhpui em em a ni," tiin England team-a amah lo kaihruai tawhtu coach hi a thlah.

Sven-a fate chuan, "Kan pa hian kumtirah khan natna a neih thu min hrilh a, a ṭhiante leh Europe-a football fans tam tak aṭangin thlawpna kan hmu ṭha hle. England, Italy, Portugal leh Sweden aṭangin football team-ten an sawm a, kan pa leh football an hmangaihna an lantir a ni.

"Ka pa leh keini tan chuan khang hun duhawm takte kha theihnghilh theih a ni lo a, a hlimin a lawm em em ṭhin - a chunga hmangaihna ang kha chu mual an liam hnu chauha lantir ṭhin a ni a, ani erawhin a dam lai ngeiin a tawng a ni," an ti.

Nun duhawm chu

Tun thlatir khan Amazon chuan Eriksson-a documentary, 'Sven' chu an ti chhuak a, Swede coach hian thil tam tak a sawi. Eriksson chuan, "Nun duhawm tak ka hmang a, kan zavai mai hian kan zinkawng zawh tawp hun tur - thihna hi kan hlau vek ni maiin ka hria.

"Mahse, nunnain a ken tel chu thihna hi a ni tel miau si a ni. A nihna anga pawm thiam mai hi kan tihtur zawk a ni. Ka tawp niah chuan, 'Pa ṭha tak a ni e,' tia ka chanchin an sawi hram ka beisei a, mi zawng zawng erawhin an ti kher lo ang.

"Hma hun êng taka thlir ṭhin mi, a theihna zawng zawng hlantu," tia min hriatreng ka beisei," a ti - Sven chuan sawi chhunzawmin, "Engmahin tihnual che u suh se la, hlim takin nui zawk rawh u.

"Coach, player leh mipuite u, engkim avang khan ka lawm e. Zinkawng duhawm tak a ni a, lo inenkawl ṭha ula, nun hi hlim leh nuam ti takin hmang rawh u. Mangṭha u le," a ti a, khawvelin Eriksson-a ka aṭangin engmah a hre leh tawh ngai dawn lo.

Mangṭha mai le

Eriksson-a hnuaia England captain dinhmun chelhtu David Beckham chuan, "Sven, mi ngaihtuah thei tak, zaidam leh pa nih tlin, i thil tih tuichilh em emtu i nihna avang khan lawmthu ka hrilh che a, i coach-na hnuaia captain armband min hrentir avangin i chungah ka lawm kumkhua tawh ang," a ti.

Inter Miami neitu hian kumin kumtira Sven a tlawhna video chu social media-ah pho chhuakin, "Kan nui a, kan ṭap bawk a, kan inthlah mek tih kan hre reng si. I chhungte leh nang nena kan hun hman ho kha ka hre reng tawh ang - Sven ka lawm a, ka hnena i ṭawngkam hnuhnung ber hmang hian ka thlah ang che. 'A ṭha leh ang,' tiin," a ti a, a boss hlui a thlah.

Eriksson-a hnuaia England tana a match hmasa ber kheltu Wayne Rooney chuan, "Sven, thlamuangin chawl rawh aw. Min puihna leh fuihna, kan hun tawn ho tam takte avang khan lawmthu ka sawi e," a ti a, Peter Crouch chuan, "Pa ropui tak a ni, mi tam takin ka chunga rinna an nghah ngam loh laia England tana ka match hmasa ber min khelhtirtu a ni a, a chungah ka lawm kumkhua ang. Ka ngai dawn hle a ni," a ti.

Chelsea legend John Terry chuan, "Manager ropui tak a ni a, mi kaihhruai thiam tak a ni," a ti a, Frank Lampard chuan, "England tana ka khelh chhung zawnga min rinna leh thlawpna avangin ka lawm kumkhua ang," a ti bawk - tunah erawh Eriksson chu thlah liam a ni ta a, khawvelah kan hmu leh tawh ngai lo ang.