Nipui bazar a tawp hnai - Engtin nge player hralh chhuah lohte hi an awm dawn?

Football-ah hian player in lei leh hralh theih hun ṭum hnih a awm a, pakhat chu nipui bazar niin a dang leh chu thlasik bazar a ni thung. Tuna transfer hun inhawng mek hi nipui bazar chu a ni a, a tawp hnaih tawh avangin transfer chungchangah zawhna neuh neuh a tam ta hle.

Tunkar chhung hian transfer-a chiang lo ṭhahnem tak chu a fel tawh dawn. Chelsea tana khel pha lo Raheem Sterling, Ben Chilwell leh Trevoh Chalobah te hmalam hun a chiang dawn. Manchester United, Liverpool leh Arsenal te pawhin thawm an nei a, player lut leh chhuak la awm thei reng a ni.

Nipui bazar tawp hun

Europe ram hrang hrangte transfer tawp hun hi a inang bik lo. Kan ngaihven ber England-ah chuan India sanaa August 31, Inrinni zing dar 3:30-ah a tawp dawn.

Kuminah hian ṭum dang ang lo takin August ni tawp berah khar a ni dawn lo; Europe-a league sang panga England, Spain, Germany, Italy leh France te chuan anmahni huna Inrinni nghak thleng loin Zirtawpniah an titawp.

Bundesliga-ah chuan August 30, Zirtawpni zan dar 9:30 (IST), Serie A-ah chuan August 30, Zirtawpni zan dar 11:30 (IST), Ligue 1-ah chuan August 30, Zirtawpni zan dar 2:30 (IST) leh La Liga-ah chuan August 31, Inrinni zing dar 4:00 (IST) ah te khar a ni dawn.

Thlasik bazar hi England-ah chuan January 1, 2025 leh February 3, 2025 chhungin hawn leh a ni ang.

Squad ziahfel hun

Club-in an player hralh tumte hralh thei ta lo se, September 13, 2024-in ngaihven a hlawh ang. Hemi hunah hian Premier League club-in player 25 awmna squad an thehluh a ngai.

Premier League match thum an khelh zawh leh transfer khar aṭanga kar hnihna a ni tawh ang a, club-ten an squad tur an tihfel a ṭul dawn. Squad-a ziahluh loh player-te chu thla eng emaw zat first team football an khelh loh a ngai dawn a ni.

An la chhuak thei em?

England-ah chuan August 31, Inrinni zingah (Aug 30 zan) transfer hun inkhar tawh mah se ram ṭhenkhatah chuan khar a la ni dawn lo. Saudi Arabia lamah chuan October 6, 2024-ah khar a ni chauh dawn a, Turkey-ah pawh September 13, 2024 thleng hawn a ni dawn.

Transfer la inhawnna hmunah chuan player-te hi an la chhuak thei reng. Kum 2023 khan Saudi Arabian club chuan Premier League-a player langsar Riyad Mahrez, Jordan Henderson leh Ruben Neves te an la lut a, kuminah pawh Saudi club zawm thei zingah Brenford striker Ivan Toney hming a ri tel.

Transfer hun loah player a lak theih em?

Theih e. Club-in engtik hunah pawh player khelhna nei lo (free agent) chu a la lut thei. Mahse, Premier League-a chhawr tur chuan an squad-ah hmun awl a la awm a nih loh chuan kum 21 hnuai lam a nih a ngai.

Squad-a inziahluhna tur hmun ruak a awm tawh lo a, kum 21 a pelh tawh bawk chuan registration hawn leh hunah chauh inelna hmachhawn turin a inziaklut thei ang.

Contract a tihtawp theih em?

Aw, player contract hi a tihtawp theih. Player leh club inremna (contract) a zirin tihtawp theih dan a awm. Sunderland chuan kum 2016 khan kum tling lo laka chesual Adam Johnson contract an titawp a, kum 2004 khan Chelsea pawhin Adrian Mutu chu cocaine a lo khawih avangin a contract an tihtawpsak bawk.

Cristiano Ronaldo-a'n December 2022-a Manchester United a chhuahsan pawh khan contract a bawhchhiah avangin a contract an tihtawp sak a, Portugal captain hi Erik Ten Hag nen an inhmu thiam lo.

PSR-in nghawng a nei em?

Player lei leh hralh chungchangah Profit and Sustainability rules (PSR)-in nghawng lian tak a nei a, PSR danah chuan club-in kum thum chhungin £105mtd aia tam an hloh thiang lo.

June thlaa Aston Villa, Newcastle United, Chelsea, Nottingham Forest leh Everton ten player lut leh chhuak an nghah chhan pawh kha PSR dan zawm an tum vang a ni.

June 30, 2024 kha financial year tawp hun a ni a, khami hmaa engkim chinfel kha a pawimawh hle. Tunah hian financial year thar hmang leh tawh mah se Premier League club tan PSR dan zawm tura fimkhur erawh a la ṭul ang.

Under 21 leh Homegrown

Premier League danah chuan player kum 21 hnuai lamte chu player 25 awmna squad-ah ziahluh kher a ngai lo. 2024-25 season-ah chuan player kum 21 hnuai lam chu January 1, 2003 leh a hnu lama piang chin an ni.

Premier League club-in player 25 awmna squad-ah player 17 aia tam home grown player ni lo, an ziak lut thei lo. Chumi awmzia chu a tlem berah player pariat tal chu home grown player an ni tur a ni.

Premier League danah home grown player ni tur hian English nih kher a ṭul lo. Kum 21 a tlin emaw a tlin kum season-ah season thum chhung emaw thla 36 chhung emaw club tana a khelh tawh chuan (a zawn kher lo pawhin) home grown player-a chhiar an ni.

UCL, UEL leh UECL

Premier League squad chang pha lote pawh Champions League, Europa League leh Conference League squad-ah a la tel theih. Europe inelna khel tur club-te chuan September 4, Nilaini zing dar 3:30-ah UEFA hnenah group stage khel tur squad an thehlut ang.

Premier League leh UEFA dan hi a dang ve hret hret. UEFA hnuaiah hian player 25 awmna List A player thehluh tur a ni. Hemi squad-ah hian player pariat chu an chherchhuah player an ni tur a ni. kum 15-21 an nih laiin kum thum chhung tal club-ah an inziahlut a ngai.

Player 25 squad chang pha lo, kum 21 hnuai lam chu List B-ah kum tluanin a inziahluh belh theih thung. Chutihrualin List A player erawh January-a nipui bazar hunah chuan a inziah belh leh theih a, knockout stage khelh hmaa registration hawn leh hunah an inziah belh thei chauh ang.