Motta enkawl Juventus an kal fawr

Juventus chuan an coach thar Thiago Motta an ngeih rih khawp mai - Motta kaihhruaina hnuaiah Serie A match vawi hnih an khel a, si thum fai ve vea hnehna changin table hmahruaitu an ni.

Thawhṭanni zan Serie A inkhelah Old Lady hian Hellas Verona chu 3-0 in an hneh. Striker Dusan Vlahovic chuan goal hnih a khung a, an goal khat dang hi Nicolo Savona khung a ni thung.

Juve hian beisei an phak lo rei ta viau a, season hmasa khan Serie A-ah pathumna ni thei mah se coach Massimiliano Allegri an ban a, tun hnai season li chhunga an chet ṭhat ber ṭum hian coach a chhanhim zo chuang lo.

Beiseina thar nen Motta an la lut a, 2019-20 season hnua a vawi khat nan Scudetto lak an tum dawn, bul an ṭan fuh takzet a, chutihrualin fiahna hautak leh harsa an la hmachhawn loh avangin an nihna tak anga sawi a la harsa.

Goal hnih khungtu Vlahovic chuan, "Coach Thiago Motta hian kan taksa mai bakah rilru lama inpeih turin min fuih nasa, chumi tur chuan nasa takin kan bei bawk. Mahni tan ni loin midang tana thil ṭha tih kan tum a, chu chuan rah ṭha a chhuah," tiin a sawi.

Juventus hian tun kartawp Pathianni hian AS Roma an mikhual dawn. Allianz Stadium-a inkhel hi Motta enkawl Old Lady tana fiahna hmasa ni tura ngaih a ni a, a zawna vawi hnih chak lai an nih avangin inrintawkna sang tak nen mikhual an thleng ang.

Inkhel dangah Como chuan AC Milan forward hlui Patrick Cutrone-a goal khung hmangin si phurh an sut a, an khingpui Cagliari nen 1-1 a inhnehtawkin Italian football inelna sang berah point khat an hlawh chhuak.

Como coach Cesc Fabregas chuan, "Inkhelh harsatna hmun aṭanga point khat kan hlawhchhuah avangin ka lawm, chutihrualin Serie A boruak hi a rang thei ang bera kan hriatthiam a ngai a, inelna sang leh lian hi hmachhawn dan thiam a ngai," a ti.