India tlangval Nagal chak lo

Tun dinhmunah India tennis player ṭha ber Sumit Nagal chu US Open-ah a inlan a, hneh nei loin a match hmasa berah a chak lo nghal.

Nagal hian Dutch player Tallon Griekspoor chu 1-6, 3-6, 6-7(8) in a hneh lo. Nagal hian a service hmasa aṭangin 61% point a hmu a, hetihlai hian a khingpui chuan 87% a hmu thung, service an hman ṭangkai dan a inthlau deuh a ni.

India chhuanvawr Nagal-a'n a khingpui service vawi hnih a chhuhsak a, a tichhe hran lo. Amaherawhchu, ama service zawk vawi ruk ngawt a hloh thung a, inelna lianah chuan mahni service hum loh a pawi thui ṭhin.

Grand Slam khelh phak a harsa a, main draw thleng phak chin pawhin lawmman ṭha tawk tak an dawng ziah. Nagal hi chak lo mah se, a inlan phak avangin $100,000 (Rs 83,85,670) chu a hlawh tho.

Kumin US Open-ah hian Nagal hian doubles a khel tel dawn bawk, ani bakah hian Rohan Bopanna, Yuki Bhambri leh N Sriram Balaji te pawh an inlan a, kawppui hran ṭheuh neiin doubles an khel dawn a ni.