Liverpool-in Chiesa an la lut mai thei

Premier League club zinga tun nipui transfer-a player la la lut lo awmchhun Liverpool-in thawm an nei ve leh a, Juventus aṭanga winger Federico Chiesa lakluh chungchang an ngaihtuah niin an sawi.

Juve manager thar Thiago Motta chuan Chiesa hi mamawh a inti lo a, Italian club-a kum khat chiah contract nei tawh hian chhuahna tur a zawng mek - Reds hian lakluh theih an inbeisei niin a lang.

Motta hnuaiah Juve hi an indinthar mek a, Como leh Hellas Verona lakah chak ve ve tawhin Chiesa hi a inlan lo ve ve. Mahse, he thu buatsaih a nih lai hian Reds hian Chiesa hi mumal taka dawrna an la nei lo.

Merseyside club hian an player duh leh mamawhte an thlithlai a, player tam tak zingah Chiesa hi a la tel ve rih chauh - tlarhma lama player nei ṭha Liverpool tan an mamawh ber a ni ang em, tih chu inzawh theih tak a ni.

Kum 26 mi Chiesa hian season hman zawh takah khan Juventus tan match 37 khelin goal 10 a khung a, assist vawi thum a nei. Italy tan vawi 51 inlan tawhin goal sarih a khung.

Hetihlai hian Liverpool hi Valencia goalkeeper Giorgi Mamardashvili nen an inhnimhnai tawh hle a, he thuziak i chhiar meuh chuan an inla lut fel tawh hial mai thei. Mahse, Spanish club-ah hian season khat loan-a khel turin a kir lehnghal dawn niin an sawi.

Manager thar Arne Slot hnuaia indinthar mek Reds hian Spain midfielder Martin Zubimendi chu lakluh tumin an lo hel tawh a, mahse, Real Sociedad player hian chhuak loa cham a thlang ta zawk.