Saudi-ah Cancelo a pem dawn

Manchester City full back Joao Cancelo chuan Al Hilal a zawm dawn a, Saudi Pro League club hi City nen Portuguese defender manah pound maktaduai 21.2-in an inrem tawh - he thuziak i chhiar meuh chuan an inla lut fel tawh hial ang.

Cancelo hi he thu buatsaih a nih lai hi chuan mimal thilah Al Hilal nen an la indawr mek a, harsatna a awm lo tura ngaih a ni. Ruahman anga engkim a kaltluan chuan kum thum chhung atan Saudi-ah hian contract a ziak ang.

Portugal defender Joao Cancelo hian kum 2019 khan Manchester City hi Juventus aṭangin £60mtd-in a zawm a, season hnih vel chu regular takin khel mah se, kum 2022-a contract thar a ziah hnu lawkah hmun a chang phak lo zui.

Cancelo hi coach Pep Guardiola nen an inhmu thiam lo nia sawi a ni a, tun hnai thla 18 kha City tan pawha khel loin Bayern Munich leh Barcelona-ah te loan-in a khel a, mahse, club pahnih hian a nghetin an la lut zui lo ve ve.

City-ah bawk a kir a, Pep-a'n Manchester khaw club tan a inlan leh theih thu sawi mah se, Community Shield-a City player tam zawk an inlan theih loh lai pawhin khelhtir a ni lo a, league match hnih an khelh tawhah a la inlan lo ve ve bawk.

Cancelo hian City tan match 154 khel hmanin, goal kua a khung bakah assist vawi 21 a nei a, Premier League (3), FA Cup (1) leh League Cup (1)-ah te champion nomawi a chawi hman a, Bayern tan Bundesliga nomawi a chawi bawk.

Season hman zawh takah khan Barcelona tan match 42 khelin goal li a khung a, assist vawi nga a nei.