Nipui bazarah Chelsea an che na Thiago Silva an la lut fel ta

Brazilian defender tawnhriat nei ṭha Thiago Silva chuan Chelsea a zawm chiang ta a, kum 35 mi defender-in Stamford Bridge-a pan thu hi Chelsea chuan nimin tlai khan an puang a ni. 

Silva hian Paris St-Germain-ah a contract a hman zawh avangin Chelsea hi a thlawnin a zawm a, season khat chhung atan contract a ziak - season khat dang pawhsei theih a ni ang. 

Chelsea tlarhnung hi Premier League season khelh zawh takah khan a pawp hle - league-a top 10 zingah goal chhuah hnem ber niin goal 54 ngawt an chhuah a, an tlarhnung siamṭha turin Silva tawnhriat a 

ṭangkai ang. 

Silva chuan, "Chelsea ka zawm thei hi ka lawm takzet a, Frank Lampard-a squad phurawm tak zinga ka tel ve thei hi ka lawm a ni. He hmunah hian nomawi chawi turin ka lokal a, Stamford Bridge-a inkhelh ka chak tawh takzet," a ti. 

Brazil tana vawi 89 inlan thei Silva hian AC Milan tan season thum khela Serie A nomawi vawi khat a chawi hnuah kum 2012 khan PSG-a zawm a, French club-ah hian season riat a khelh chhungin league-ah vawi sarih a champion.

PSG tan hian Coupe de France (5), Coupe de la Ligue (6) leh Trophee des Champions (5) nomawi a chawi bawk a, Champions League final-ah Bayern Munich an ngam loh avangin a champion ta lo thung. 

Chelsea hian Nice defender Malang Sarr chu kum nga chhung atan contract ziahpuiin an lalut bawk a, Ligue 1 club-a a contract hmang zo defender hi 2020-21 season chu loan-in an chhuahtir leh phawt ang. 

Chelsea hian nipui transfer-ah Ajax aṭangin winger Hakim Ziyech, RB Leipzig striker Timo Werner leh Leicester City leftback Ben Chilwell an lalut tawh a, player pathum hi kum 28 hnuai lam vek an ni - Lampard-a'n Premier League nomawi chawi ngei 

a tum.