Coco Gauff a talbuai lo

US Open hmeichhe champion lai Coco Gauff chuan Varvara Gracheva lakah harsatna a tawk lo a, nuamsa taka hnehna changin second round a inhlangkai.

Arthur Ashe Stadium-a inkhelah Gauff hian darkar khat leh minute ruk chhungin Gracheva hi 6-2, 6-0 in a sawp a, tun hnaia a khelh ṭhat loh tak chu a kalsan dawn ni pawhin a lang.

Season hmasa US Open final-ah khan Gauff hian Aryna Sabalenka hnehin nomawi a chawi, kuminah Australian Open leh French Open semifinal a thleng leh bawk a, inelna dangah erawh sulhnu ropui a ngah lo.

Kum 20 mi Gauff chuan, "Nomawi humhim tum ngawr ngawra inkhel ni ila chuan, ka tan thil hlimawm leh thil thar dawn tur a awm lo ang. Chutiang ni loin, kei chuan kumin hi chona thar leh tournament thar angin ka hmachhawn zawk," a ti.

Inkhel dangah Aryna Sabalenka chuan Priscilla Hon chu 6-3, 6-3 in a hneh a, Belarus star hian hnehna chang turin vawi 27 ngawt aces a siam a, a match lehpekah chuan Lucia Bronzetti a hmachawn leh ang.

Cincinnati Open champion Sabalenka chuan, "Ka khelh ṭhat ber ṭum a ni lo, point khat hmuh belh tur pawh khan harsa takin ka bei hram hram ṭhin a ni. Hon-i kha fisr round-a tum atan chuan a harsa takzet," tiin harsa taka a chak thu a sawi.

Zheng Qinwen pawh a chak - Paris Olympic champion Amanda Anisimova lakah set a hloh hmasa a, mahse a hnuhnung pahnih la thungin 4-6, 6-4, 6-2 in hnehna a chang, a vawi khat nan Grand Slam title lak a tum mek.