Chelsea player ṭhenkhat khung hrang

Season thar atana inbuatsaih Chelsea chu Covid-19 vangin an buai a, an player zingah hri kai an awm tih hmuhchhuah a ni. Coronavirus kaite hian taksa lamah harsatna nei hran lo mah se an khung hrang.

English media rintlak Guardian-in a tarlan dan chuan Blues player zingah hian a tlem berah pali chuan hri an kai - Tammy Abraham, Mason Mount, Christian Pulisic leh Fikayo Tomori te chu khunghran nghal an ni.

Covid-19 inkaihhruaina dan angin Emerson, Michy Batshuayi, Ross Barkley leh Jorginho te chu midang tlawhpawh lo tura tih an ni bawk. Hri kaite hi ni 10 chhung inkhung hrang tur an ni a, training an neih hmain an filhlim tawh em tih endik leh hmasak tur a ni bawk.

Blues hian kar hmasa aṭang khan training an nei ṭan leh tawh a, season thar inbuatsaih nan Inrinni zan hian Brighton & Hove Albion nen friendly match an khel ang. Premier League-a an match hmasa ber atan chuan September 14 hian Brighton nen bawk an inkhel dawn a ni.