Super Over hmangin Kolkata leh Punjab chak
Pathianni khan Indian Premier League-ah inkhel pahnih a awm a, Super Over vawi thum khelh a ni. Kolkata Knight Riders-in Super Over hmangin Sunrisers Hyderabad an hneh a, Kings XI Punjab-in Super Over vawi hnih khelh hnuah Mumbai Indians an hneh ve bawk.
Zanin dar 7:30-ah Kings XI Punjab leh Delhi Capitals an inkhel dawn. Delhi-in Qualifier 1 an hnaih tawh laiin Punjab tan erawh Elimnator khel tur pawhin chak ngei a ṭul dawn.
Inkhel chu
Sheikh Zayed Stadium-ah Hyderabad-in vawm hmasak an thlang a, Kolkata-in run 163/5 an siam. Hyderabad-in 163/6 in an chhanglet a, amaherawhchu Super Over-ah run 2/2 chiah an siam avangin Kolkata-in ball hnih dah bangin run 3/0 an siam a, hnehna an chang.
Dubai International Stadium-ah Mumbai-in run 176/6 an siam a, Punjab-in 176/6 thoin an chhanglet. Super Over hmasa zawkah run nga ve ve an siam a, vawi hnihnaah Mumbai hian run 11/1 siam thei mah se Punjab-in ball hnih dah bangin run 15/0 an siam a, point hnih hlu tak an hlawh chhuak.
Kolkata tan Ferguson
Kolkata Knight Riders tan Lockie Ferguson a che ṭha hle. New Zealand bowler hian over li a vawmah run 15 chauh siamtirin wicket thum a la a, Super Over-ah a langsar lehzual.
Super Over hi over khat chauh a ni a, batsman pathum chiah an inlan thei. Kolkata bowler Ferguson-a'n ball vawi thum vawm lekah run hnih pein captain David Werner leh Abdul Samad te a vawm hlum a, chak turin hna harsa a awm tawh lo.
Kolkata tan Eoin Morgan leh Dinesh Karthik te rawn pen chhuakin wicket hloh loin hnehna an chang.
Super Over vawi hnih
Kings XI Punjab-in semifinal beiseina chhi nung turin chak an mamawh a, harsa takin Mumbai Indians an hneh. Over 20-ah 176/6 ve ve an siam a, Punjab captain KL Rahul-a'n run 77 a siam.
Super Over hmasa zawkah Mumbai chhuanvawr Jasprit Bumrah-a'n vawmin run 5/2 a pe. Amaherawhchu Punjab-in Mohammad Shami an kawl a, run 5/1 pein Mumbai an chelh.
Super Over vawi hnihnaah Mumbai-in run 11/1 siam mah se Bumrah-a'n a vawm thei tawh lo. New Zealand bowler Trent Boult hmaah Chris Gayle (7) leh Mayank Agarwal (8) te che ṭhain ball hnih bang chungin run 15/0 an siam a, hnehna an chang.