Chaltlang Ryders an chak ve ta

Thawhlehni zan dar 8:00 khan Samsung 3:16 Plan Solution Mizoram Super League-ah chak hmel la hmu lo pahnih inkhelah Chaltlang Ryders-in Zarkawt Ser­pents 70-63 in an hneh.

Hawla Indoor Sta­dium-a inkhelah hian March 14 zinga Republic Basketball Court-a a practice lai chau thut a boral zui ta Jerome Lalrammuana sunna hun inkhelh hmain hman a ni a, minute khat chhung ngawi renga din a ni.

Inkhel an ṭan a, team pahnihin MSL-a an record duhawm lo thaichhiat tumin chak ngei tumin an innawr tawn a, an inngam tawn hle. 1st quarter-ah team pahnih an inbei tawk a, 2nd quarter-ah erawh Chaltlang Ryders an chung­nung zawk. Quar­ter tinah team pahnih an inum tawn zak zak a, a tawpah Chaltlang Ryders an chungnung zawk ta a ni.

Zarkawt Serpents lamin an players an rawn siksawi nasa a, an match nga khelhna ah pawh team an la inhre chiang lo hle niin a lang. An players langsar fal an awm lo a, a che ṭha deuh ber Champhai tlangval Lalremruata'n point 8 a score bakah rebounds vawi sarih a la.

Chaltlang Ryders tan Point Guard Lalmuanpuia Zote bawk a hmuhnawm leh a, Ramhlun North tlangval hian a team tan point 29 zet score-in rebound vawi sarih a la a, a team a chakpui.

Eng nge an sawi?

Zarkawt Serpents manager Dino Laldinpuia Chhangte chuan, "Kan game khan awmzia a nei lo a ni ber mai. Game tam tak khelh tur kan la neih avangin players inen chhin nan kan hmang a, kan ṭhat dan ber tur kan la zawng mek a ni. Kan player te rilru leh taksa lamah an hah tawngkhawng tawh a, kan game plan kan ṭhelh a ni ber mai," a ti.

Dino chuan chak hmel an la hmu lo chung pawha khawtlang mipuiin an ṭawiawmna chuan a tih­lawm takzet thu sawiin san beisei result an pek thuai a beisei thu a sawi bawk.

Chaltlang Ryders Asst. Coach Marc Lal­thlamuana Sailo chuan, "Chak ngei tumin kan khel a, kan beisei ang result kan hlawh chhuak kha kan lawm hle. Vawi li lai kan chak loh hnua chak hmel kan hmu thei hi kan player-te pawh an phur phah a, kan game khelh leh turah pawh danglamna a thlen theih ngei kan ring a ni. Match thum lai khel thei tawh lo kan 'big man' David Lalrinchhana a lo kir leh tawh a, kan ṭangkaipui zia chu kan game-ah khan a langchhuak nghal a ni," a ti.

Marc-a chuan veng chhung mipuiin an ṭawi­awm ṭhat vanga a lawm thu sawiin ṭawiawm chhun­zawm zel turin a sawm.