South Africa in awlsam takin semi-final an lut

Nimin zing dar 9:00 khan ICC World Cup 2015 quarter-final match hmasa berah South Africa leh Sri Lanka an inkhel a, South Africa in awlsam takin wicket kua in hnehna an chang.

Sydney Cricket Ground, Sydney-a inkhelah hian South Africa tan spin bowler Imran Tahir-a che ṭha a, run 26 chiah pe in wicket li a la thei. Wicket­keeper-batsman Quinton De Kock chuan run 78 vaw chhuakin a tawp thleng a dam bawk.

Ṭhumvawra vannei zawk Sri Lanka in bat hmasak an thlang a, an thlang fuh lo. Over 37.2 thleng chiah an khel hman tihin an vaiin an out vek a,. run 133 an tlin thei hram.

Sri Lanka tan World Cup zawha ODI chawlhsan mai tawh tur Kumar Sangakkara-a'n run a siam hnem ber a, ball 96 a hmachhawnah run 45 a vawchhuak. Sangakkara hi kumin World Cup-ah run siam hnem ber a ni mek a, match sarih a khelh aṭangin run 541 a vawchhuak thei a ni. World Cup zawha ODI chawlhsan ve tur tho Mahela Jayawardene chuan run li bak a tlin lo.

Lahiru Thirimanne chuan Sri Lanka tan ball 48 a hmachhawnah run 41 vawchhuak mahse an ṭhiante'n an thlawp ṭhat tawk loh avangin run 133 bak an tlin lo.

South Africa in an target run 134 an um, over 18-ah mi pakhat chiah hlohin run 134 an vawchhuak a, ICC World Cup 2015 semi final lut hmasa ber an ni ta a ni. South Africa hian New Zealand leh West Indies inkhela chak zawk zawk an tum ang.