Mario Balotelli a ṭawng chhuak

Beiseina sang tak nen Liverpool in AC Milan aṭangin pound maktaduai 16 sengin Mario Balotelli an la lut a, beisei erawh a phak lo hle. Liverpool tan match 20 khel tawhin goal li chiah a la khung a, Premier League-ah phei chuan goal khat bak a la khung lo. A thlak tak Luis Suarez nena khaikhin phei chuan Balotelli-a'n sawisel a tawk hi a awm lo hran lo.

Italian striker nung­chang ṭha lo ve tak hi a ngawi reng peih tawh bik lo a, instagram-ah amah sawiseltu te a chhanletna video a tarchhuak. Kum 24-a upa Italian striker chuan, "Min hre reng reng a mi? Nang hian min be tawh reng reng em? Ka nunah hian eng nge ka paltlang i hria em? Khelmuala ka inkhel bak hmuh i nei lo, chuvang chuan ngawi mai rawh," tiin a video-ah hian amah sawi­seltute a tawng a ni.

Manchester City stri­ker hlui hian chanchin maksak tak tak a ngah ve hrim hrim a, kum 2011 a Manchester City player a nih laiin Manchester United lamnah a pet goal a, a lawm nan a kawr hnuaia 'Why always me?' tih a ziah chu a hlim lang a, hei hi a larpui hle.

Man City a zawm tirh hian a car in a chesual a, pound 5000 lai a ak bawk. Hemi ṭuma Police officer in, "Engvanga heti zat pawisa pai nge i nih?" tih zawhna chu, "Ka hausak vang," tiin a chhang! Balotelli hian vun rawng vanga hmuhsitna a tuar thei lo em em a, "Ka vun rawng vanga min hmusittu chu ka that ang," tiin ṭawngkam a lo nei tawh hial a ni.

Inter Milan-a khelh laia a boss Jose Mourinho chuan, "Enkawl theih loh," tiin Balotelli hi a lo sawisel a, City-a amah enkawltu Roberto Mancini chuan, "Thil tam tak a tisual ṭhin, a chhan chu Mario a nih vang a ni. Mahse, amah hi misual a ni lo, player ropui leh talent nei ṭha tak a ni," tiin a lo sawi tawh bawk.