Pa rorum Advocaat

Sunderland boss thar Dick Advocaat hi pa ro­rum leh khirh tak a ni a, mi hnuaichhiah ching mi erawh a ni lo - hei hi Dutch journalist Marcel van der Kraan ngaihdan a ni.

Advocaat hian record ṭha tak a nei a, PSV Ein­dhoven a enkawl laiin Dutch Eredivisie (1996-97) leh Dutch Cup (1995-96) a lak pui tawh a, Scottish club Glasgow Rangers a enkawl laiin Scottish Premier League ṭum hnih (1998-99, 1999-2000), Scottish Cup ṭum hnih (1998-99, 1999-2000) leh Scottish League Cup ṭum khat (1998-99) a lak pui a, Russian club Zenit St Petersburg chu UEFA Cup (2007-08) leh Russian Premier League (2007) a lak pui bawk.

Club pathum a enkawl laia a chak dan percentage hi 65% chunglam a ni vek bawk.

Dutch manager Advo­caat hian Premier League-ah chona thar a hmachhawn dawn a, tuna a hmabak chu season thara Premier League khel tura Black Cats dah a ni.

Dutch journalist Kraan chuan, "Advocaat hian a hnampui Sou­thampton manager Ronald Koeman leh Manchester United manager Louis van Gaal te ang thoin khelh dan phung nghet a nei a. Vawi khat chetfuh loh vanga khelh dan hmang thlak chi a ni lo. Chubakah chona hmachhawn hi a nuam tih zawng a ni a, an record thlirin Russia ramah Dutch manager Guus Hiddink aiin a hlawh­tling zawk a ni," tiin Advocaat chu a dah sang hle.

Kum nga liamta khan Sunderland-in Advocaat hi a be tawh a, a hlawhtling lo. Rin loh takin Black Cats-in manager tawnhriat nei ṭha an la lut a, a chetfuh chuan Premier League chung lam pawhin an harsatna an tawh phah ang.