Europa League preview Zaninah quarterfinal lut tur a chiang dawn

Europe-a inelna sang ber dawttu Europa League last 16 second leg zaninah an khel dawn a, quarterfinal lut tur an zawng dawn.

Team langsar zingah Italian club ṭha Napoli-in Dinamo Moscow hmachhawn turin Russia ramah an zin ang a. Dynamo Kiev khelmualah Everton an lenglut dawn.

Inter Milan-in khualmuala an hneh loh German club Wolfsburg an mikhual dawn a, Spanish club pahnih Sevilla leh Villarreal te'n quarterfinal luh an inchuh dawn bawk.

Dinhmun ṭhaa ding Napoli

Zanin dar 10:00-ah Napoli-in Moscow-ah Russian club ṭha Dinamo Moscow an lenchilh dawn a, an dinhmun a ṭha zawk. Team pahnih hian Napoli khelmual Stadio San Paolo-ah first leg an lo khel tawh a, mual neitu Napoli in 3-1in hnehna an chang. Dinamo tan tlang tur chuan an mikhual lakah goal chhuah lo a goal hnih tal an thun a ngaih dawn avangin a harsa ang.

Ukraine-ah Everton

Zanin dar 11:00-ah Everton in Ukrainian club ṭha Dynamo Kiev an tum dawn a, quarterfinal lut turin an tan goal chhuah loh a tawk.

Everton leh Dynamo Kiev hian Everton khelmual Goodison Park-ah first leg an lo khel tawh a, 2-1 in Toffees ho chak zawkah an ṭang.

Everton-in khualmualah goal khat lek an chhuah a nih pawn away goal rule in khualmuala goal khat nei zawk Dynamo Kiev an tlang daih thei.

German club hmaah Inter

Inter Milan in zanin dar 1:05-ah German club ṭha Wolfsburg an mikhual dawn a, quarter final lut turin goal hnih tal an thun a ngai ang.

Volkswagen Arena, Wolfsburg khelmuala first leg an khelh ṭumin Inter in Belgian winger Kevin De Bruyne an ngam lo a, 1-3 in an tlawm.

Italian club hian goal hnih an khung a, goal an chhuah loh bawk chuan away goal rule hmangin an tlang thei dawn. Mahse, tunhnai match 21 chhunga vawikhat chiah chak loh hmel hmu Wolfsburg hneh tur chuan tunhnaia match nga chhung vawi khat chiah chak thei Inter hian an khelh ṭhat ve fe chu a ngai ang.

Spanish club pahnih intum dawn

Europa League-a Spanish club pahnih inkhel turah Sevilla in an khelmual Estadio Ramón Sánchez Pizjuán-ah Villarreal an mikhual dawn a, zanin dar 1:05 inkhel turah hian mual neitu Sevilla dinhmun a duhawm zawk.

Spanish club pahnih hian Villarreal khelmual Estadio El Madrigal-ah first leg an lo khel tawh a, 1-3 in mual neitu a tlawm zawkah an ṭang. Villarreal-in tlang tur chuan goal thum tal an khung a ngaih dawn avangin a harsa tawh ang.