Match fixing tum Nimes an tla
Thawhlehnia French League (LFP) thuchhuakin a tarlan danin Ligue 2 club Nimes chu an president hlui Jean-Marc Conrad-a'n match fixing tuma hma a lo lak chungchangah thiam loh a chan avangin season tawpah third division-ah an tla ang.
LFP disciplinary commission president Sebastien Deneux chuan, "Conrad hian match ṭhenkhatah thamna hmanga chak tumna a nei a, a chet dan hi infiamna kal hmang kalh a ni," a ti.
Nimes hi nikum khan tla thei dinhmunah an ding a, Conrad hian Ligue 2 match liah an khingpuite tham tumin hma a lo la a, kum sarih chhung hrem a ni ang.
Conrad bakah club neitu zinga chan nghah ber Serge Kasparian chu kum 10 chhung football-a inrawlh thei lo tura hrem a ni bawk.
Ligue 2 club Nimes hian French federation (FFF) hnenah an zualko thei ang. France-ah hian match fixing thubuai hi a vawi khat thlenna a ni lo a, Olympique de Marseille chu kum 1994 khan 1992-93 season-a match fixing-a an inrawlh avangin second division-ah an tlak tir bakah 1993 French title an hlih sak bawk.