Ze ngai chhuah Arsenal an tla

Arsenal-in Champions League quarterfinal thleng turin Stade Louis II-ah goal thum tal khung an mamawh a, Olivier Giroud leh Aaron Ramsey hmanga goal hnih chauh an khung theih avangin France ramah thil mak an thlen tir lo.

Thawhlehni zan khan Arsenal-in Monaco 2-0 in an hneh mah se Emirates Stadium-ah 1-3 zeta an tlawm avangin 'away goal rule' hmangin an tla.

Ze ngai chu

Arsenal hian season ṭan hma apiangin league-ah champion an sawi ri a, season lai hawlah squad chhah tawk loh avangin rinkai zingah an tel pha lo. Season tawp lamah che ṭha lehin Champions League khelh phak vangin an lawm ṭhin.

Champions League-ah an danglam lo, nikum khan Emirates Stadium-a Bayern Munich an hneh loh avangin Germany-ah draw result hlawhchhuak mah se an tla tho a. Tun ṭuma Monaco an hneh loh dan chiah hian kum 2013 khan Bayern Munich lakah 'away goal rule-in' an lo tlawm tawh bawk.

Arsenal hian kum 2010 hnuah Champions League quarterfinal an la lut lo. Monaco erawhin kum 2004 hnua a vawi khatna atan quarterfinal an thleng thung.

Inkhel hmuhnawm

Arsenal-in goal thum khung turin minute 90 hun an nei a, Bellerin-a cross chu minute 14-naah Giroud-a'n na takin a tauh a, goal sirah chiah chiah a kal.

Dinglamah Alexis Sanchez, vei lamah Danny Welbeck, hmatawnga awm Giroud-a hnungah Mesut Ozil a awm a, Santi Cazorla-a'n hnung deuh hret aṭangin a rawn nawr pui bawk a. Arsenal-in game hmuhnawm an lantir.

Monaco-in Dimitar Berbatov leh Joao Moutinho te hmangin Arsenal tlar hnung rum ṭhaih ve bawk mah se first half-a goal khungtu chu ball chang tam zawk Arsenal an ni.

Minute 36-naah Welbeck-a through ball chu Giroud-a'n um lutin a vawi khat petna chu keeper Danijel Subasic-a'n dang mah se a per leh chu French forward hian chiang zetin a khung. First half-ah 1-0 a ni a, Arsenal-in goal hnih dang an mamawh.

Second half ṭan tirhah Welbeck leh Sanchez hmangin Arsenal an hlauawm chhunzawm a, darkar khat hnuah erawh Monaco game rawn zia awmin Arsenal tlar hnung tan hna an siam sak.

Goal mamawh Arsenal-in Ramsey leh Theo Walcott an luh tir a, substitute awmze nei a ni. Minute 11 chiah a awm tawh tihin Walcott-a'n vei lam aṭanga cross chu ban a tih per hnuah Layvin Kurzawa clear ṭhat loh chu Ramsey-a'n chiang zetin a pet lut.

Injury time-ah Arsenal-in freekick an hmu a, Ozil-a'n petin Sanchez tan tauh rem tak ni mah se Giroud-a'n a pet khalh a, Subasic-a'n a dan sak.

France-ah Arsenal 2-0 in an chak a, Champions League an khelh zel erawh a rem tawh lo.