Team intiat tawk Tuikual South Vs Vikings
Zanin dan 8:00 hian Hawla Indoor Stadium-ah Tuikual South leh Mission Veng Vikings ten Samsung 3:16 Plan Solution Mizoram Super League an khel leh ang.
Team intiat tawk tak inkhel tur an nih avangin ngaihven a hlawh hle. MSL match li khel tawh ve ve an ni a, match hnih chak tawhin match hnih ve ve bawk an chak lo tawh. Point ruk ve ve an hmu mek a, zanin a chak zawk hi table-a pathumna tur an ni.
Fans nei ṭha ṭhin ve ve an nih avangin khawi zawk nge au ring ang tih rin thiam a har. Hall chhung boruak a nawm dawn avangin MSL hi zirlaite tan exam chawlh hmanna ṭha tak a ni ngei ang.
Tuikual South tan an veng tlangval F. Zodinthara bawk a pawimawh leh dawn. Ani hian MSL-ah point 60 lai a score tawh bakah rebound ṭum 45 zet a la tawh bawk. Tuikual South forward Dina bakah hian Vanchhuangpuia Armed Veng tlangval leh Luangmual fachuam C.Lalfakawma te an pawimawh bawk ang. Anni pathum hi chak pui tham khawp a player ṭha vek an ni.
Sawi hmaih theih loh chu Haryana aṭanga an lak luh Rakesh a awm leh tawh a, an match hnuhnung bera Zarkawt Serpents an hneh ṭumin Rakesh hian rebounds a la tam hle.
Vikings lamah chuan point 60 score tling tawh pahnih Moses Zoremmawia, Model Veng leh Lalrina Renthlei, Tuikhuahtlang te an ṭangkai ang. Anni pahnih hi Tuikual South lam tan chuan chaw ei ti tui lo tham an ni. MSL-a an pahnih point score belhkhawm chauh pawh hi 125 zet a ni tawh.
Eng nge an sawi?
Mission Veng Vikings coach Reuben Lalchhandama chuan, "Kan khingpui turte hi kan huphurh hran lo a, chak zawk kan nih ngei ka beisei. BCA nen kan inkhelh ṭum khan hun tawp lamah kan inthlahdah kha kan tuar tawh a, chuvangin kan fimkhur tawh dawn, khatiang kha a thlen nawn kan duh tawh lo," tiin a sawi.
Tuikual South coach Kc-a chuan, "Kan khingpui tur Vikings hi team ṭha tak an nih avangin fimkhur takin kan khelh a ngai dawn a, kan khelh ṭhin dan pangngaiin chak ngei tumin kan bei leh ang. Kan player zingah inhliam an awm loh avangin duhtlan tur kan nei tam a, kan chak ngei ka beisei," tiin Vanglaini palai a hrilh.