NT-a'n fight hmachhawn dawn ta

Mizo boxer langsar bera chhal ngam NT Lalbiakkima chuan professional huang chhunga a fight hmasa ber a hmachhawn dawn ta a, Pathianni zanah Delhi tlangval Vimal Kumar nen an inhnek dawn. 

NT-a inlanna tur hi Warrior Boxing Series tih a ni a, Marine Pro Boxing Promotions buatsaih inelnaah hian Siaha tlangval hi a tel ve dawn a ni - hnehna chang tura rin hlawh zawk a ni. 

Mizo boxer rothap chuan, "Mizo mipui ṭawngṭaipuina ka dil a, hriselna ṭha tak nei a, dam ṭha taka inhnek ka hmachhawna ka chak theih nan min lo dilpui rawh u," tiin Vanglaini kaltlangin Mizo mipui ṭawngṭaipuina a ngen. 

Navy boxer ni ṭhin NT-a hian LPS pro fight aṭangin Mizo mipui hmelhriat a hlawh ṭan a, kum 2015 khan Indian Navy, Indian Army, Indian Airforce leh Railways aṭangin sawmna a hmu vek - Navy zawm a thlang zui. 

NT-a'n Navy-a zawm hnuah pawh amateur boxing-ah sulhnu duhawm tak tak a hnutchhiah zui a, chung zinga langsar ber chu June 8-a world number 1 leh olympic champion Hasanboy Dusmatov-a hneh kha a ni. 

Indian media-ten Mizo tlangval an hmelhriat ṭan a, media chaw tui ber chu Siaha boxer hi a ni - mahse, NT-a'n a beisei loh dan takin amateur boxing huangchhungah duhsak a hlawh tawk lo. 

NT-a thinlungah professional boxing luhchilh duhna a reh thei lo a, mahse, Siaha lama sangha zuar fapa tan professional boxing luhchilh tur chuan a hna chan a ngai a, NT-a pa N. Zomawia chuan an dinhmun thlirin tih chiah a ngai lo.

June 6, 2019 khan NT-a pa N. Zomawia'n a natna thlahin a chhungkua a hahdamsan a, a kal dawna a fapa hnena a thuchah chu professional boxing luhchilh tura tih a ni. 

NT-a'n a châk ṭhin em em professional boxing luhchilh chu a pa phalna nen a luhchilh a, VN Promotions nen contract ziakin South Korea-ah training nei turin a kal zui. 

NT-a'n South Korea a awm chhungin WBC Asia title fight neih theih a beisei a, mahse, Covid-19 vangin a beisei ang fight a thleng thei lo. South Korea chhuahsanin a lo haw a, Marine Pro Boxing Promotions nen an thawkdun zui. 

'Zo Keite' tia hminglem an pek boxer hian a beisei ang ngeiin fight a nei thei dawn ta a, a hmachhawn tur Vimal Kumar hi amateur boxing huang chhunga kum nga lo tal tawh a nih avangin a awlsam dawn lo. 

Inhnekna tur hmun hi Marine Centre, Navi Mumbai a ni a, fite.tv, fite app leh The MMA India Show facebook page-ah te live-in a en theih ang a, Pathianni zan dar 6:00-ah inhnek ṭan a ni ang - NT-a te hi fight parukna vela inhmachhawn tur an ni a, dar 6:00 hnu lamah Siaha tlangval hi a inlar dawn chauh tihna a ni. 

NT-a'n Mumbai a pan hmain Aizawl-ah rim takin training a nei a, Dr. Lalmuanpuia (MF&AS) chuan Bawngkawnah Siaha tlangval tan hian gym a thlawn vekin a siamsak. 

Boxing a luhchilh tirha dumbbell leina tur a neih loh avanga lungtum chawi chunga tlankual ṭhin NT-a chuan, "Dr. Muanpuia min thlawpnaah lawmthu ka sawi a, ka strength & conditioning coach Biakzuala chungah lawmthu ka sawi takmeuh bawk a ni," tiin Vanglaini a hrilh. 

NT-a hian hnehna a chang a nih chuan February-ah Warrior Boxing Series final round a hmachhawn leh ang a, Marine Pro Boxing Promotions neitu Devraj Das chuan hemi zawhah hian Siaha tlangvalin WBC emaw WBO Asia title a fight theih dan tur an buaipui zui tur thu Vanglaini a lo hrilh tawh bawk.