Monaco-in quarterfinal thlen an phu lo - Wenger

Arsenal-in an chak loh an tuar thiam lo a nih pawhin a awm thawkhat viau, khualmualah an che ṭha tlat. Amaherawhchu tawnhriat neih tlem an tuar a, Emirates Stadium-ah 2-1 a chak loh theih reng laiin sut an tum a, 3-1 in an chak loh phah.

Arsenal manager Arsene Wenger chuan, "Monaco hian team ṭha pariat zinga tel hi an phu loin ka hria. Goal zawna team pahnih pet zat thlir ula, mak inti ang. Chak loh hrim hrim a hreawm a, kan chak lo si lo," tiin a sawi.

Arsenal hian a zawnin vawi nga last 16 stage an thleng tawh lo a, Monaco hma hian Bayern Munich (2), AC Milan leh Barcelona te an hneh lo tawh.

Wenger chuan, "Ṭum danga kan tlak dan nena khaikhinin tun ṭhum hi a lungchhiatthlak berin ka hria. Chutihrualin kan inkhelh dan thlir erawh chuan lawmna tur chu a tam khawp mai. Monaco khan an khelmualah goal zawnah vawi khat mah an pet lo a, quarterfinal an lut si," tiin an vanduai thu a sawi nawn.

A eng zawnga thlirin Monaco manager hlui Wenger chuan, "Season tin hi a danglam tih ka hria a, season tawp kan khar dan hi a pawimawh ber chu a ni. Monaco laka kan khelh dan ang khan season tluan thlenga khelh kan tum ang," tiin a sawi.

Gunners defender Per Mer­tesacker ngaihdan erawh a dang thung. German World Cup team zing ami chuan, "Team ṭha zawk an tlang. Monaco khan first leg an khelh ṭhat avangin quarterfinal thlen hi an phu a ni. Monaco khelmualah theihtawp kan chhuah a, goal hnih aia tam khung thei pawh kan ni. Kan ui tak ber chu first leg kha a ni," tiin Emirates Stadium-a an khelh chhiat chu an tawrh thu a sawi.